New Delhi, Kyllalyngkot 08: Ki phra tylli ki jylla jong ka thain shatei lammihngi kin iashim bynta ha ka rukom kaba heh ha ka Madhavpur Mela jong ka Gujarat kaba dei ban long ha ka taiew ba nyngkong jong u bnai Iaiong mynta u snem.
Ia kane ka mela kaba ju long shisien shi snem la pynlong ha Madhavpur Ghed ha Porbandar district bad kane ka Mela mynta u snem kan sdang ha ka 2 tarik Iaiong, ka sngi hadien ka Ram Navami festival.
U Myntri khynnah jong ka Sorkar Pdeng ba dei khmih ia ka tnad Development of North Eastern Region (DoNER), MoS PMO, Personnel, Public Grievances, Pensions, Atomic Energy and Space, Dr Jitendra Singh u la pyniaid ia ka jingialang bad ki heh ophisar jong ka sorkar Gujarat ha ka nongbah mynta ka sngi ban iakren halor ki jingpynkhreh na ka bynta kane ka festival kaba heh bha.
U Secretary, North Eastern Council (NEC), Moses Chalai bad ki heh ophisar jong ka NEC, nalor ki Resident Commissioner/ki dkhot na Arunachal Pradesh, Assam bad Manipur ki la iashim bynta lang.
U Dr Jitendra Singh u la bthah ia ki ophisar ba nalor ka Madhavpur, ki prokram ba kynthup ia ki prokram kolshor, ki jingpyni ia ki tiar shna kti bad ki food festival jong ka thain shatei lammihngi yn pyni ha kiwei kiwei ki nongbah ba kongsan jong ka Gujarat ba kynthup ia ka Ahmedabad ban khring ia ki paidbah ha ka thain.
U la ai jingmut ban saindur ia ka logo ban wanrah ki jingpyniasoh hapdeng ka Gujarat bad ka thain shatei lammihngi bad ka Indian Council for Cultural Relations (ICCR), ki Zonal Cultural Centre (ZCC), ka Song & Drama Division jong ka Information & Broadcasting Ministry nalor ki tnad ba dei khmih jong ki sorkar jylla kin iashim bynta shitrhem ha ki kam bapher bapher.
Yn plie ia ka jingialap ban pynsapriang paidbah (multimedia publicity campaign) ia ka khubor ha ka 1 tarik Lber, 2020 ban pynbna nam ia ka Madhavpur Mela. Kane kan long ka dak jong ka jingiatylli ka kolshor jong ka Gujarat bad ka thain shatei lammihngi hapoh ka Ek Bharat, Shrestha Bharat ba la pynbna da u Myntri Rangbah duh jong ka ri, u Narendra Modi, u la bynrap.
Ka Madhavpur Mela jong ka Gujarat ka iasam ia ka jingiadei jong ka bad ki jaitbynriew Mishmi jong ka jylla Arunachal Pradesh. Ki jaitbynriew Mishmi kidei kiba la hiar pateng na u Syiem Bhishmak bad lyngba jong u sha ka khun jong u ka Rukmini bad u Blei Krishna.
Kane ka festival ka rakhe ia ka jingiaid lynti kaba im (immortal) ha kaba ka Rukmini ka la sdang na Arunachal Pradesh sha Gujarat bad u Blei Krishna. La lap ba la kdew ia ka Bhismaknagar, kaba don hajan Roing ha lower Dibang Valley district, ha ka Kalika Purana.
Ka ‘Utsav’ kaban neh baroh shi taiew lynter kan sakhi ia ka kolshor ba iphuh iphieng ha ka art, ka jingshad, ka put ka tem, ki poitri, ki jingiathuh khana bad ki drama ba iadei bad ki por barim na Arunachal Pradesh, Manipur bad kiwei kiwei ki jylla ka thain shatei lammihngi bad ka jingthmu ban pyniatylli ia ki kolshor ba riewspah jong ki artylli ki thain.
Ka Madhavpur Ghed, kaba rit hynrei ka shnong kaba kongsan, kalong ka jaka ha kaba katkum ki khana pateng la ong ba u Blei Krishna u la kyntiew kurim ia ka Rukmini, ka khun jong u Syiem Bhishmaka. Ka Madhavpur ka don harud duriaw, marjan bad ka Porbandar.
Ka Madhavrai temple kaba naduh ka spah snem ba 15 ka don ha kane ka jaka. Ia kane ka prokram la pyndon burom da ka cultural fair ba la pynlong manla ka snem, kaba la sdang ha Ram Navami. La shna ia ka kali iapom (chariot) kaba bun rong kaba rah ia u Blei Krishna ha kaba la pyniaid kylleng ka shnong bad ki jinglehkmen ki la bteng haduh san sngi.
Ka Madhavpur Mela mynta u snem kan sakhi ia ki prokram kolshor kaba itynnad na ka thain shatei lammihngi, khamtam na Arunachal Pradesh bad Manipur. Ki kynhun na Assam kin pyni ia ka Rukmini-Haran, ka prokram tynrai lane kolshor jong ka thain.
Ka kynhun rwai na Manipur kin rwai ia ki jingrwai ba iadei bad ka Rukmini ha Khullong Ishei bad Nat genŕe. Ki drama-jingshad katkum ka khana halor ka Rukmini bad u Blei Krishna na Arunachal bad Manipur bad ka jingshad tynrai jong ki riewlum Idu Mishmi na Arunachal kin iadon bynta ha kane ka prokram.
Kan don ka jingpyni bad ka jingdie ia ki tiar shna kti bad ki jain ba la thain na Arunachal Pradesh, Manipur bad kiwei kiwei ki jylla ka thain shatei lammihngi ki ban iadon bynta ha ka prokram.
Kan don ka Visual Art Exhibition halor ka Krishna bad Rukmini ban buh lang da ki institution bapher bapher jong ka Ministry of Culture kum ka Indira Gandhi National Centre for the Arts bad Indira Gandhi Rashtriya Manav Sangrahalaya kiba pynpaw ia ki khana pateng jong u Krishna bad Rukmini ki ban long ki bynta ki ban khring bha.
