Shillong, Jymmang 23: Ban the lakam ia ka seng Congress ha Meghalaya mynta ka shong ha ka All India Congress Committee (AICC), ka jingleit jong u Bah DD Lapang mynta ka sngi sha Delhi ka long ba un leit rah ia ka khubor sha ka president jong ka party ka Sonia Gandhi ia kaei kaba ki MLA Congress na Meghalaya ki don ban pynsngew lyngba u president ka MPCC.
Katkum ki thymmei khubor kiba ia jan bad ka seng Congress kiiathuh ba mynta ha kane ka jingleit jong u bah Lapang sha delhi ka long ban kyntu ia ka Sonia ba ka dei ban bthah ia u myntri rangbah ka jylla u Dr Mukul Sangma ba un khot iaka jingialang jong ka Congress Legislature Party ban jied ia u nongialam ba thymmai ban ialam ia ka sorkar.
Katkum ki thymmei khubor la ong ba lada ka AICC kam sngap ia kane ka jingkwah jong ki MLA na kane ka jylla kumba ki la dawa na ka por sha ka por , kannym donlad shuh iaki MLA lait noh sa tang ba kin pynkad arliang ia ka seng Congress ban mih noh bad thaw da kawei ka kynhun ban ioh nongialam da u wei ban thaw ia ka sorkar kaba thymmai ha kane ka jylla.
Kumba ka long mynta ka seng Congress ka don 30 ngut ki MLA ha ka iing dorbar kaba 60 ngut bad na kine ki 30 ngut ban pynpra ia ka seng Congress arliang ki don kam kumba 9 ngut. Ki lad khubor ki iathuh ba ka jingdawa jong ki MLA na ka seng Congress kiba don ha ka liang pyrshah ia u myntri rangbah kala dang jur ha dien ba ka kyrtong congress kala rem kput ha kane ka MP election ha Tura bad ha Khasi Hills kajingshah rem ha ka elelction shiteng samoi ha Nongstoin.
