Shillong, Naitung 04: U Bah Sanbor Shullai Chairman jong ka Meghalaya Tourism development Corporation (MTDC) u la ia kynduh ia u myntri khynnah ka sorkar pdeng ba dei peit ia ki kam shangkai pyrthei u K J Alphons ha nongbah Delhi ban ia kren kumno ban kyntiew ia ki kam jongohkai pyrthei ha kane ka jylla Meghalaya.
Ha kane ka jingiakynduh na ka liang jong u Bah Sanbor Shullai u la ia kren bad u myntri ka sorkar pdeng ha kaba ia dei bad kiba bun bah ki skhim kiba ka sorkar jylla kala phah ha kaba ia dei bad ki kam pynroi ha kane ka jylla kiba dei na ka tnad shangkai pyrthei.
Ha kane ka jingiakynduh na ka liang jong u myntri khynnah ka sorkar pdeng u la ai ka jingkular ia u Bah Sanbor Shullai ba na ka liang jong u un sa peit ia kaba dei ban leh ha kaba ia dei bad ki skhim kiba dang sah teng lyngba ka skhim ia kaba la tip kum ka “Central Swadesh Darshan Scheme”.
