Shillong, Nohprah 09: Ka jingkieng surok kaba pyniasoh ia ka Majai bad ka Sohbar halor ka wah Tharia kaba don ha Majai, u sa leit ban plie da u myntri rangbah ka jylla u Conrad K Sangma ha ka 19 tarik mynta u bnai.
Da ka jingplie ia kane ka jingkieng, kan pyniasoh ia ki shnong ka thain ri War naduh Sohbar shaduh Nongjri , Umniuntmar bad ki bynta jong ka Majai sha duh Shella.Kane ka jaka ka hap hapoh jong ka Konstitwensi jong u Dr Donkupar Speaker jong ka iing dorbar thawain ka jylla Meghalaya.
Da ka jingplie ia kane ka jingkieng kan pynsuk ym tang ia ki paidbah ka thain Ri War kiba don da ki phew tylli ki shnong ha katei ka thain, hynrei kongsan eh na ka bynta ki shipai BSF kiba ai ka jingiada ia ka khappud India bad Bangladesh.
Ki thymmei khubor ki iathuh ba na ka liang jong u myntri rangbah ka jylla u Conrad K Sangma u la buh sngi ban leit ban plie ia kane ka jingkieng ha ka 19 tarik mynta u bnai. Kane ka jingkieng ka la kylla kawei na ki jaka jngohkai pyrthei ha katei ka thain ha kaba ki paidbah man ka sngi kila ia tuid sha katei ka jaka.