Yn pan ka FOCSS na ka sorkar pdeng ia ka mang tyngka ia ki Autonomous Council ha NE

Shillong, Risaw 04: Mynta ka sngi hapoh jong ka lama jong ka “Forum of Council under Sixth Schedule” (FOCSS) kaba kyntup ia baroh shiphew tylli ki Autonomous Council kiba don ha kane ka thain shatei lam mih ngi jong ka Ri India kila ia kynduh ha kane ka nongbah Shillong ban ia kren kumno ban iakren bad ka sorkar pdeng na ka bynta ki Council tang kawei ka sur sha ka sorkar pdeng.

Haba kren ha ki lad pathai khubor u Chairman jong ka FOCSS u bah Pynshngianlang Syiem Chairman jong ka KHADC, u la ong ba ka jingiakynduh mynta ka sngi ka dei ka sien kaba lai naduh ba la seng ia ka. Ha kane ka jingiakynduh kila ia kren halor ki lai tylli ki bynta kiba ktah lang ia baroh ki Autonomous Council ha kane ka thain shatei lam mih ngi jong ka Ri India.

Kaba kila ia kren ka long ba ki Autonomous Council ha kane ka thain ki don hapdeng ka jingeh ha ka liang ka pisa namar ba ka jingbei pisa na ka sorkar pdeng kam wan beit sha ki Council bad la ong ba ha ka jingkwah ka sorkar pdeng ban pynkylla ia ka Sixth Schedule kila buh ia ki Council hapoh ka artikle 280 haba ia dei bad ka jingbei pisa na ka sorkar pdeng ba hap ban iaid lyngba ki sorkar jylla.

Kawei pat ka phang kaba kila ia kren ka long ba baroh ki Council ki dei ban phah ia ki jingai jingmut jong ki ha kaba ia dei bad ka jingkwah jong ka sorkar pdeng ban wanrah ia ka jingpynkylla ia ka Sixth Schedule hapoh mynta u bnai bad ha u Naiwieng u ban wah ki lah ban leit ai sha ka Parliamentary Standing Committee, ha ka juh ka por kin pan por ban pynjlan lada long kaba lah.

Naduh ba la seng ia ka FOCSS kala iaid mynta khlem don kino kino ki riti pyniaid ia ka kumta kane ka jingialang kala rai ban don noh ia ka riti pyniaid ia ka namar kan long kaba ia di beit, haba ia dei bad kane la aiti sha ka sub committee ba kan peit bniah ban sain dur ia ki kyndon trei kam.

Haba jubab ia ki jingkylli na ka liang jong u Bah PN Syiem u la ong ba ka jingkwah jong ki Autonomous Council baroh ka long ba kin ia don ia ka juh ka bor trei kam, namar kumba ka long mynta ka bor trei kam ka iapher na kawei ka jylla sha kawei pat, ki kwah ba baroh ki Council kin don  ia ka juh ka bor. Ha kane ka sngi ki dkhot jong ki Autonomous Council kila ia poi sha kane ka jingiakynduh lang ha Pinewood Hotel Shillong.

What Next?

Recent Articles

Leave a Reply

Submit Comment

*