Guwahati, Naitung 10: U Ravi Shankar Prasad, Myntri jong ka sorkar pdeng ba dei peit ia ka Electronics bad Information Technology bad Law bad Justice un pyllait ia ka ‘Digital North East Vision 2022’ lashai ka sngi ha Radisson Hotel ha Guwahati. Ia ka Vision Document yn pyllait ha ka jingiadonlang ki Myntri Rangbah bad ki Myntri IT jong ki sorkar jylla ka thain shatei lammihngi bad ki heh ophisar jong ki Ministry jong ka sorkar pdeng ba kynthup ia ka DoT bad DoNER bad ki ophisar na ki sorkar jylla jong ki jylla ka thain shatei lammihngi.
Ka Vision Document ka pynshai ia ki jingmyntoi jong ki digital teknoloji ban pynkylla ia ki jingim jong ki briew jong ka thain shatei lammihngi bad ban kyntiew ia ka rukom im kaba suk. Ka Document ka la ithuh phra tylli ki bynta ba kynthup ia ka jingpynbiang ia ki jingdonkam ban pyntreikam lyngba ki bor internet.
Ka jingai jingshakri lyngba ki bor internet, ka jingpynkupbor na ka bynta ka jingtreikam lyngba ka internet, ka jingkyntiew ia ki nongshna tiar elektrik, ka jingkyntiew ia ka IT bad ITes ba kynthup ia ki BPO, jingsiew pisa lyngba ki bor internet, ka jingpyrkhat thymmai halor ki kam shimet bad ka jingshngain jong ki kam ba trei lyngba ka internet. La saindur ruh ia ka jingpyntreikam ia ki prokram digital ha ki jylla ka thain shatei lammihngi. Lyngba kine, ka Vision Document ka thmu ban pynkup bor ia ki briew jong ka thain shatei lammihngi.
Kin don ruh lai tylli ki jingialang ban pynlong lashai ka sngi hashuwa ka prokram na ka bynta ban pyllait ia ka Vision 2022. Kine ki kynthup ia ka Networking Workshop halor ka Hub bad Spoke Model for BPOs, ka jingialang halor ban pyniar ia ka kam bad ban kot sha ka thong jong ka Common Services Centre bad sa kawei ka jingialang halor ka Government eMarket Place (GeM).
Kine ki jingialang kilong na ka bynta ban pyni ia ki nongiashim bynta sha ka jingpyntreikam bad ki bynta jong kine ki prokram ha ka ban plie ia ki lad ai kam ai jam, ka jinglah ban ai ka jingshakri bapher bapher lyngba ki bor internet (digital) sha ki paid nongshong shnong ha ki thain nongkyndong bad ban kyntiew ia ka jingshakri kaba bha jong ki bor synshar.
Kumjuh ruh hashuwa ka jingialang kaba kongsan, u Myntri ba dei peit ia ka Electronics and Technology bad u Myntri Rangbah jong ka Assam kin buh ia u maw nongrim na ka bynta ka Common Facilitation Centre bad Smart Meter Manufacturing facility ha ka Electronics Manufacturing Cluster (EMC) ha Tech City ba don ha ka shnong Bongara, Assam ban kyntiew ia ka jingshna ia ki tiar elektrik ha ka thain shatei lammihngi.
Ha kane ka jingialang, yn buh maw nongrim ruh na ka bynta saw tylli ki NIELIT (National Institute of Electronics & Information Technology) ha Guwahati, Shillong, Lunglei bad Gangtok. Ka NIC (National Informatics Centre) kan plie ia ka website Secure, Scalable bad Sugamya kum ka Service (SwaaS) website na ka bynta ka jylla Arunachal Pradesh bad Tripura. Ban pynpoi ia ka jingshakri shaduh ki nongshong shnong ba don sha tduh, la plie ia ki MyGov portal na ka bynta ka jylla Arunachal Pradesh, Manipur bad Tripura. La plie ia ka STPI (Software Technology Park of India) ha Agartala, Aizawl bad Shillong.
La plie ruh ia ka BPO centre hapoh ka North East BPO Promotion Scheme (NEBPS) ha Majuli, Assam. Ia ki kam jong ka State Data Centre (SDC) ha Manipur mynta la ssdang ban rah sha ka Cloud Platform. Lyngba ki kam jong ka ERNET (National Research and Education Network) India ki khynnah skul ha Tripura mynta ki lah ban ioh ia ka jingpule lyngba ka bor internet. La pyniasoh ruh ia ka Digital Locker bad ka Secondary Education Board Assam bad Nagaland e-District. La plie ruh ia Decision Support System katkum ka GIS na ka bynta ki jylla ka thain shatei lammihngi bad ka North Eastern District Resource Plan Geo-Portal (NEDRP).
La khmih lynti ba ka ‘Digital North East’ kadei ka bynta ba kongsan jong ka prokram Digital India. Kan iarap ha ka jingpyndonkam ia ka bor jong ka Information Technology na ka bynta ka roi ka par ha baroh ki liang jong ka thain shatei lammihngi bad ban sngewthuh ia ka jingmyntoi jong ka baroh.
