New Delhi, Rymphang 01: Khnang ban kot sha ka thong kaba bha ha kaba iadei bad ka koit ka khiah bad ka bha ka miat jong ki nongshong shnong, la mang tyngka kumba T. 69,000 klur sha koit ka khiah ha ka mang tyngka jong ka Sorkar Pdeng 2020-21. Kane ka kynthup T. 6400 klur na ka bynta ka Prime Minister Jan Arogya Yojana (PMJAY).
Haba wanrah ia ka Mang Tyngka jong ka Sorkar Pdeng 2020-21 ha Parliament mynta ka sngi, ka Myntri Sorkar Pdeng ba dei khmih ia ka tnad pla pisa ka Nirmala Sitharaman ka la ong, “Mynta, hapoh ka PM Jan Arogya Yojana (PMJAY) ki don palat 20,000 ki hospital ba la pyniasoh.
La donkam shuh shuh kham bun ha ki nongbah Tier- 2 bad Tier -3 na ka bynta ki briew kiba duk hapoh kane ka scheme. La tyrwa ruh ban wanrah ia ka Viability Gap funding window ban shna ia ki hospital ha ka PPP mode.
Ha ka bynta ba nyngkong, yn kynthup shuwa io ki Aspirational District, kiba mynta kim don ia ki hospital kiba la pyniasoh bad ka Ayushman. Kane kan plie shibun ki lad ioh kam ioh jam na ka bynta ki samla. Yn pyndonkam ia ka jingiohnong ban kyrshan ia ki jingdonkam ha ki kam ai jingsumar.
Ka Sitharaman ka la ong shuh shuh ba ki bor pyniaid hospital bad ki nongtrei ka koit ka khiah ki lah ban khmih ia ka jingpang da ki rukom iada ba la saindur da kaba pyndonkam ia ki machine bad AI, ha ka Ayushman Bharat scheme.
Ka la ong, “La plie ia ka TB Harega Desh Jeetega campaign. Nga kyrpad ban pynkhlain ia kine ki jingpyrshang na ka bynta ka jingtrei tyngeh ban pynkut ia ka jingpang khrew “Tuberculosis” hapoh u snem 2025”.
Ka Myntri ba dei khmih ia ka tnad pla pisa jong ka sorkar pdeng ka la pynbna ruh ban pyniar ia ka Jan Aushadhi Kendra Scheme sha baroh ki district da kaba ai 2000 ki dawai bad 300 ki jingpang ba hap ban shna (surgical) hapoh u snem 2024.
