New Delhi, Iaiong 01: Ka jingiada ia ki longkmie bad ki khynnah kiba don ka bynta kaba 67.7% jong ka jingbun paid ka ri India bad ka jingpynthikna ia ka roi ka par kaba pura jong ki ha ka jinglong jingman kaba long kaba shngain ka long kaba donkam bha na ka bynta ka roi ka par kaba iaineh jong ka ri bad ruh ban pynurlong ia ki jingkylla ha ka ioh ka kot bad ka imlang sahlang.
Ka thong kaba kongsan jong ka tnat Women and Child Development ka dei ban pyndap ia ki jaka ba suda ha ki kam jong ki jylla na ka bynta ki longkmie bad ki khynnah bad ban kyntiew ia ka jingiatreilang ki tnat sorkar ban wanrah ia ki ain kiba pynthikna ka jingiaryngkat kyrdan ki longkmie, ki kynthei bad ki shynrang ha ka imlang sahlang.
Ki polisi bad ki prokram ban pynbiang ia ka jinglong jingman kaba ki longkmie bad ki khynnah ki don bynta, kaba long kaba jemdor, kaba lah ban shaniah bad kaba lait na kanokano ka jingibein bad ka jingthombor.
Ha kane ka bynta, la pyrshang ban pynurlongia ki thong hapoh ki skhim jong ka tnat lyngba ka jingkyrshan jong ki sorkar jylla bad ki bor pyniaid ia ki UT kiba bahkhlieh ia ka jingpeit ia ki skhim ha ki jaka ba pyntreikam.
Ban pynurlongia kine ki thong, ka kynhun Myntri jong ka Sorkar Pdeng ka la ai jingmynjur ia lai tylli ki skhim jong ka tnat ki ban pyntreikam ha ka rukom mission mode kiba long la Mission Poshan 2.0, ka Mission Shakti bad ka Mission Vatsalya. Ia baroh lai tylli kine ki mission yn pyntreikam ha ka samoi jong ka 15th Finance Commission naduh u 2021-22 haduh u 2025-26.
Ka tnat kan sa pynlong ia ki Zonal Conference bad ki Jylla bad UT ha Chandigarh (2 tarik Iaiong), Bengaluru 4 tarik Iaiong, Guwahati 10 tarik Iaiong, Mumbai 12 tarik Iaiong bad Bhubaneswar 13 tarik Iaiong.
Ka jingthmu jong kine ki Zonal Conference ka dei ban ai jingtip ia ki sorkar Jylla, bor pyniaid UT shaphang ki lai tylli ki Mission jong ka tnat ban plie lad ia ka jingpyntreikam bha ia ki skhim ha kine ki 5 snem ki ban wan katkum ka jingtreikam lang ka Sorkar Pdeng bad ki Sorkar Jylla ban pynthikna ba ki jingkylla ha ka imlang sahlang kumba la thmu hapoh ki Mission ki urlong na ka bynta ka bha ka miat jong ki longkmie bad ki khynnah jong ka ri.
Mission POSHAN 2.0 ka dei ka Integrated Nutrition Support Programme.Ka thmu ban pynbeit ia ki jingeh kiba iadei bad ka jingbym ioh bam ba tei ki khynnah, ki samla kynthei, ki longkmie ba dang pun khun bad ki kmie kiba dang ai buin lyngba ka jingkylla na ka jait bam ba ai bad ka jingpynpoi ia kine bad ruh da kaba wanrah ia ka rukom treikam kaba pura ban kyntiew ia ki rukom im kiba kyntiew ia ka koit ka khiah ka jingbha bad ka jinglah ka met ban iada na ki jingpang.
Ka Poshan 2.0 ka thmu ban pynbhaia ka jingbha bad ka jingpynpoi jong ka bam hapoh ka Supplementary Nutrition Program. Ka Poshan 2.0 kan kynthup ia lai tylli ki prokram, skhim kiba kongsan hapoh jong ka kiba long ka jingai jingshakri ki Anganwadi Services, ka skhim na ka bynta ki kynthei samla bad ka PoshanAbhiyaan.
Ka Mission Shakti ka thmu ban don kawei ka jingkyrshan kaba pura na ka bynta ki longkmie lyngba ka jingai jingsumar, ka jingshngain, ka jingiada, ka jingpynthymmai bad ka jingpynkupbor ia ki longkmie ban weng ia ki na ka jait shah teh mraw katba ki dang iaid lyngba ka jingim jong ki.
Ka Mission Shakti ka don ar tylli ki sub-skhim kiba long ka ‘Sambal’bad ‘Samarthya’. Ka “Sambal” sub-skhim ka deina ka bynt aka jingshngain jong ki longkmie bad ka “Samarthya” sub-skhim ka dei na ka bynta ka jingpynkupbor ia ki longkmie.
Ka jingthmu jong ka Mission Vatsalya ka dei ban pynthikna ka jinglong khynnah kaba koit ba khiah bad kaba dap da ka jingkmen na ka bynta baroh ki khynnah jong ka ri; ban wanrah ia ka jinglong jingman kaba sngewthuh, kyrshan bad iatreilang na ka bynta ka lawei jong ki khynnah; ban ai jingiarap ia ki jylla bad UT ba kin pyntreikam ia ka Juvenile Justice Act 2015.
Ban kot sha ki thong SDG. Ki bynta hapoh ka Mission Vatsalyakin kynthup ar tylli ki kynhun kiba peit ia ki kyndon bad ki ain; ki lad ai jingshakri, ki jingai jingshakri; ka jingai jingiarap ha ka imlang sahlang; ka jingai jingiarap ha ki por ba kyrkieh; ka jingai jinghikai bad ka jingkyntiew ia ki jingnang jingstad.
Ki skhim hapoh ka Mission ki dei kiba bei tyngka da ka Sorkar Pdeng bad la pyntrei da ki Sorkar Jylla bad bor pyniaid ia ki UT ha ka rukom kaba iabah lem ia ka jinglut jingsep. Dang iasam ia ki kyndon jong ki skhim bad ki jylla and UT.
