Shillong, Nailar 06: U Director ka tnad ka koit ka khiah u la kren shai ba ka sorkar kan sa pynshitom ia u wei na ki nongtrei ka Civil Hospital Shillong ynda u la koit na ka jingshitom ha kaba u la mih na Quarantine Centre ban leit buh ia ka lok sha Rangthong PHC ha ka sngi ba ar.
Haba kren ha ki lat pathai khubor u Dr War u la iathuh ba une u briew u trei kum u nongai dawai ha pharmacy ha Civil Hospital Shillong, hynrei namar ba u don ka jingiajan bad u wei u ba long positive kumta la phah shong Quarantine ia bad la shim ia ka sample na u hynrei ha ka sngi ba ar u la mih na ka Quarantine centre ban leit buh ia ka Lok kaba trei ha Rangthong PHC bad haba la ioh ia ka reslot ka long positive.
U Dr War u la iathuh ba une u briew haba u leit sha Rangthong PHC ban leit buh ia ka lok u la rung katto katne ki bynta jong kane ka PHC, ha dien ba u la wan na Rangthong u la leit sha ATM kaba don ha Mawkyrwat bad kiwei ki jaka, na ka liang jong ka tnad ka koit ka khiah ka dang wat mynta ia kiba don ka jingiadei bad u ne u briew.
Na ka liang jong u Director u la ong ba la dep ban shim ia ka sample jong ka Lok jong u ne u ba don positive bad lada ka reslot ka long Negative kan kham pynduna ia ka jingma hynrei lada ka long positive kan kham eh. Haba ia dei bad kane ka tnad ka koit ka khiah kan sa phah ia ka kaiphot sha ka sorkar namar u dei u nongtrei sorkar.
