Shillong, Rymphang 10: U myntri ba dei peit ia ki kam pynroi sor u bah Hamletson Dohling mynta ka sngi u la ong ba ia ki jingtrei na ka bynta ka “Shillong Smart City” da T.149 klur tyngka na ka bynta ki lai tylli ki jingtrei.
U myntri pynroi sor u la ong ba ia ka jingai kontrak ban shna ia ka Iew Laitumkhrah yn sa ai noh ha kine ki sngi kaba la kot sha ka T.34 klur, shen ynsa khot tender ban pyntreinoh ia ka iew Polo kaba la kot sha ka T.80 klur tyngka bad ia ka Smart Road ha Bivar Road kaba 6 km ha ka jinglut kaba T35 klur.
Haba jubab ia ki jingkylli na ka liang jong u myntri u la ong ban a pdeng ki 100 tylli ki jaka hapoh ka Ri India ba la jied ba kin long ki Smart City ka nongbah Shillong ka dei kaba khatduh, hynrei ban ia nujor bad kiwei ki jylla ka Shillong kala kham iaid sha khmat ha ka jingpyntrei kam.
La ong ba ka sorkar kala dep ban shna ia ka Shillong Smart City Limited bad la thung ia u TV Krishna Morthy kum u Chief Executive Officer ba pura ban peit ia kane ka kam ha kane ka nongbah Shillong.
Na ka liang jong u myntri u la ong ba ka dei ka jingshisha ba ka jingbei pisa na ka bynta kane ka kam ka long ha ka ratio 50:50, na ka liang jong ka sorkar kan wat ki lat ki lynti wat la ka don ha pdeng ka jingeh bad kin don ruh ki jingtrei ba hap ban leh ha ka Public Private Patnership (PPP) Mode.
La ong ruh ba na ka liang ka Shillong Smart City Limited kala dep ban buh ha ka website jong ka ban pan jingmut na ki paidbah aiu ki don ban ong bad ia kane ka jingpan jingmut kan kut ha ka 29 tarik mynt au bnai.
