Shillong, Nohprah 08: Ka dorbar Pomlakrai Pyllun Mawbynna, Pdeng Shnong, Umiew, Mawtharia, Liewlong, Rngi Shillong Ka pynpaw Ka jingsngewnguh kaba kyrpang ia u Dr Mukul Sangma, Chief Minister, Meghalaya, u Zenith Sangma, Minister Sports, u Bah John F Kharshiing, Working President, MSOA, ka Kong M War Nongbri, IAS, Director Sports, u Bah J Lakiang, Chief Engineer, bah Lamborsing Nongrum, President, Nongkrem Sports Club, bad ia ki long heh officer na Ka tnad ialehkai jong ka jylla halor ka jingmynjur ban pdiang ia Ka jaka madan jong Ka Pomlakrai Pyllun ban tei ban buh ia kawei na ki Indoor Stadium kaba heh tam hapoh jylla Meghalaya, na ka bynta ka National Games 2022.
Kum ka shnong ka pynpaw ka jingsngewnguh kaba khraw ia u Bah John F Kharshiing, Working President, Meghalaya State Olympic Association, uba la trei shitom ban ia pyniakynduh bad ki bor jong ka tnad Sports Department naduh u bnai Kyllalyngkot 2017, ban iakren ia ki bor Sorkar ban wanrah ia katei ka jingdonkam jaka ialehkai ki samla kane ka thain Mylliem – Khyrim.
Na ka liang jong ka shnong kala ioh jingtip na ka tnad ialehkai ba ia katei ka jaka ialehkai la dep khot tender kaba haduh 21.40 Crore, bad shen kin sa sdang noh ia ka jingtrei. Kane ka thain jong ki kam juh phohsniew ban ioh ia kum katei ka jait jingshna kaba heh haduh da ki phew crore.
Sa shisien ki pynpaw ia ka jingsngewnguh kaba khraw ia katei ka jingkloi ka tnad Sports ban pdiang ia katei ka jaka Pomlakrai Pyllun bad ki khot sngewbha bad kyrpad rit ia u Bah John F Kharshiing, ha ryngkat ka tnad Sports Department ban kyntu iu Chief Minister bad u Sports Minister ka jylla Meghalaya ba kin thaw ka lad ban wan buh noh ia u maw nongrim kum shibynta ban ioh sdang noh ia katei ka jingpynkhreh ia ka National Games.
