Shillong, Nohprah 18: U Bah Shibun Lyngdoh president jong ka BJP Meghalaya state Unit u la ong ba ka BJP kan khot aplikoshon ia ki kyrtong ban ia khun na ka party ha kane ka MLA elekshon sha ka iing dorbar thawain ka jylla ha dien ba la pynbna ia ka elekshon da ka elekshon komishion jong ka Ri India.
Haba kren ha u SP News Agency, u Bah Shibun u la ong ba kaei kaba ki leh mynta ka long ba ha man la ki madal lane kita ki konstitwensi, ka BJP ka khot ia ki dkhot jong ka party ba uno uno u dkhot jong ka party kiba kwah ban ia khun ia ka MLA elekshon ki lah ban buh ia ki aplikoshon jong ki hynrei ka aplikoshon kaba ban jied ia ki kyrtong kan long ynda la pynbna ia ka elekshon.
Kane ka jingleh jong ka party ka long ban ailad iaki MLA kiba kwah ban wan sha ka party BJP, ha ka juh kapor na ka liang jong ka BJP kam juh kular iano ban ai tiket, ka jingpynslem dei na kane, namar kala jia ha Assam, kila don 10 ngut ki MLA kiba la pyniasoh bad ka BJP hynrei ha ka por ba ai tiket ka ai tang 7 ngut bad kala jia ha Gujarat ha kaba ki MLA jong ka BJP ki duh tiket.
Ka jingpynkhreh ia ka elekshon sha ka iing dorbar thawain jong ka jylla kala iaid sha khmat bad baroh ki mandal ki long kiba la khreh ban poi sha ka elelkshon MLA, ka jingpynkhreh kala iaid kum ka party ha baroh kawei ka jylla.
