Shillong, Nailar 18: Bun na ki riew paidbah khatam na kito ki nongkyrshan jong ki ar ngut ki MLA kiba la shah beh seng jong u bah Gabriel Wahlang bad bah Charles Marngar, ki kylli la ka Congress kan leh kumno ia ka jingiatreilang bad ka NPP ha KHADC.
Ka Congress ka don saw ngut ki MLA, bah Ronnie V Lyngdoh ba dei MLA bad MDC, Bah Gabriel Wahlang MLA bad MDC, bah Charles Marngar MLA bad MDC bad u Dr. Celestine Lyngdoh MLA. Katba u wei pat u bah PN Syiem dei tang u MDC.
Khlem da kwah ban pynpaw ia ka kyrteng ka jingkylli kaba ki kylli, ka long ban ia treilang ka Congress bad NPP ha KHADC ka long ha kaba u bah PN Syiem un long Deputy Chief Executive Member, hynrei ban ia treilang ha ka sorkar jylla kam long.
Kane ka jingbeh seng ka party Congress ia ki ar ngut ki MLA ka kren shai ba ka dei ka party kaba bit ia kiwei bad kambit ia kiwei, ki pynpaw ba kum ki nongmihkhmat paidbah ki hap ban trei na ka bynta ban wah rah ia ki kam pynroi hapoh konstitwensi.
Haba phai sha ka Mawhati ban ioh ia ka C&RD Block kan long ka jingmyntoi kaba khraw ia ki paidbah namar mynta ki hap ban leit sha Umsning na ka bynta ka jingdon kam ka jong ki, ka Block ka long kaba don kam bha ia ki paidbah nongkyndong ha ka roi ka par.
