Guwahati, Nailur 23: Ka North Eastern Handicrafts and Handlooms Development Corporation Limited bad ka Gems bad Jewellery Export Promotion Council (GJEPC) ki la pynskhem ia ka jingiatreilang mynta ka sngi lyngba ka jingiasoiMoU ba la pynlong ha NEHHDC campus ha Guwahati, ban pliepaidbah ia ka Indian Institute of Gems & Jewellery (IIGJ), Guwahati Campus.
Kane ka jingiatreilang kalong ka sienjam ba kongsan sha ka jingpyntreikam ia ka sienjam PM Vishwakarma (Nongshna ksiar) ha ka thain shateilammihngi, kaba phaikhmat ban kyntiew ia ki nongtrei kti bad ki nongseng kam lajong ha ka kam shna mawkordor bad ki jingdeng.
Lyngba kane ka MoU, ka IIGJ (hapoh ka jingkyrshan jong ka GJEPC) kan wanrah ia ki briew ba tbit ha ki sap treikam bad ai jinghikai sha ka thain shateilammihngi. Ka jingiatreilang kan iarap ban pyntreikam ia ka sienjam PM Vishwakarma (nongshna ksiar), kaba ai jinghikai pyntbit ba kyrpang bad ai jingkyrshan ia ki nongtrei kti bad ki nongseng kam lajong ban kyntiew ia ka kam.
Nalor ka jingiasoiia ka MoU, la khot sngewbha ia ki nongseng kam lajong bad ki nongtrei kti na ka kam shna mawkordor ban iashim bynta ha ka jingiamir jingmut. Ki la iasamia ki jingsngew jong ki halor ki jingeh ba ki mad bad wad ki lad ki lynti ban kyntiew ia ka kam shna mawkordor ha ka thain.
Ha kane ka jingialang, ka Dr.Sriparna B. Baruah, Nongai buit, NEHHDC, ka la ban jur ia ka jingdonkam jong kane ka jingiatreilang ban pynurlong ia ka sienjam PM Vishwakarma (nongshna ksiar) ha ka thain shateilammihngi, ban kyntiew ia ka sap treikam bad wanrah ki kabu ba thymmai ia ki nongtrei kti.
U DebasishBiswas, CEO jong ka Indian Institute of Gems and Jewellery (IIGJ), u la pynpaw ka jingsngew skhem jong u ba ka jingiatreilang bad ka NEHHDC kan wanrah ka jaka kyrpang jong ka IIGJ ha ka thain shateilammihngi.
Ha kane ka jaka yn ai jinghikai ha kane ka kam ia ki nongsaindur bad ki nongsengkam lajong na kane ka thain, ha ryngkat bad ki jingiadei bad kito kiba trei ha kane ka kam, ki kynhun khaii pateng bad ki pateng ban wan kiba kwah ban pyntbit ha ka kam shna maw kordor bad ki jingdeng.
Ha kane ka jingialang la iashim bynta da ki ophisr ba kynthup u SiddharthHimmatsinghka, COO, GJEPC, u KaushikGhosh, Regional Director, GJEPC Eastern Region, u Koushik SV, Head jong ka IIGJ Udupi, u Lokesh Kumar Parganiha, Deputy Director bad HoD, MSME-DFO, Guwahati, bad u PalashBhowmick, Chief Manager, NSIC. La iadonlang ruh u SantanuDeka bad u BhaskarKakotyna ka Indian Institute of Entrepreneurship (IIE) ha kane ka jingialang.
Kane ka MoUkan kyntiew ia ki kabu na ka bynta ka kam shna mawkordor bad ki jingdeng ha ka thain shateilammihngi bad pynnehpynsah ruh ia ka deiriti jong ka thain.
Ka NEHHDC kadei ka kynhun jong ka sorkar India hapoh ka Tnad Development of North Eastern Region (DoNER). Ka trei ban kyntiew bad kyrshan ia ki nongtrei kti bad ki nongthain jain ha ka thain shateilammihngi lyngba ki sienjam kiba pynneh ia ka pateng jong ka deiriti bad kyntiew ia ka roi ka par kaba iaineh.
Kala seng ia ka Jewellery and Handicrafts Livelihood Business Incubator hapoh ka skhim ASPIRE (ka skhim ban kyntiew ia ka jingsaindur thymmai, ki karkhana ha ki jaka nongkyndong, bad ka jingseng kam lajong) jong ka MoMSME.
Kane ka incubator ka thmu ban pynkup bor ia ki nongtrei kti jong ka thain bad kyntiew ia ki rukom treikam ba lah ban iaineh ha ki kam shna mawkordor bad ki jingdeng bad ka kam shna tiar da ki kti.
La sdang ia ka Gem & Jewellery Export Promotion Council (GJEPC) da ka Sorkar India ha u snem 1966 ban kyntiew ia ki kam shna mawkordor jong ka India.
Ka GJEPC ka kut jingmut ban wanrah ia ka jinglong jingman kaba bha na ka bynta ki kam kiba iadei bad ki mawkordor bad ki jingdeng, da kaba ai jingkyrshan lyngba ki polisi, ka jingkyntiew ia ki sap bad ki prokram ban pyniar ia ki iew.
La seng ha u snem 1986, ka Indian Institute of Gems & Jewellery (ka sienjam jong ka Gems & Jewellery Export Promotion Council) ka don 5 tylli ki campus ha Delhi, Mumbai, Jaipur, Varanasi bad Udupi ka ai ki jinghikai ban ioh degree, diploma bad syrnot, bad ka don palat 22,000 ngut kiba la pyndep ia kine ki jingpyntbit.
Ka jingplie ia ka Guwahati campus ka dei ka kynhun kaba 6 na ka bynta ka IIGJ ha India. Kane ka campus kan phaikhmat ha ka PM Vishwakarma bad kiwei kiwei ki prokram ai jinghikai kiba lyngkot samoi.
