Shillong, Nailur 23: Ka seng samla pule ka thian shatei lam mih ngi jong ka Ri India hapoh ka lama jong ka North East Students’ Organisation (NESO), ka dawa na ka sorkar pdeng ban pynshitom ia ka kynhun shipai 21 Para (SF) kiba don kti ha ka jingsiat iap ia ki 14 ngut ki riew paidbah ha Nagaland ha ka 4/Nohprah/2021.
Ka jingshah siat iap jong ki riew paidbah ha ka kynhun shipai kala jia ha ka 4/Nohprah/2021 ha Mon District ka jylla Nagaland ha kaba 14 ngut ki riew paidbah kila shah siat iap ha ka kynhun shipai 21 Para (SF) jong ka kynhun shipai, wat la ka kynhun tohkit Special Investigation Team (SIT) kala lap ia ki jingshisha.
Ka NESO kala ong ba ka iing bishar kaba ha khlieh duh jong ka Ri India ha ka 17/Nailur/2024 kala khang noh ia kane ka mukotduma pyrshah ia ki shipai kiba la shah kynnoh. Kane ka rai ka dei ka jingshah iuhroit ia ka hok jong kiba khlad bad ia ka iing ka sem kiba la ap khmih lynti ban ban ioh ia ka jingbishar kaba hok.
Ia ka kynhun tohkit Special Investigation Team (SIT) la thaw da ka sorkar Nagaland ba kan tohkit bniah ia kane ka jingjia bad kala kdew shai ba ki don 30 ngut ki shipai na ka kynhun 21 Para (SF) kynthup ia ki ophisar ha katei ka jingsiat iap, ia ka kaiphot la ai sha ka District and Sessions Court jong ka Mon, ha kaba ka sorkar pdeng kala kyntait ban ai bor ban pynshitom.
Ka jingbym don ia ka jingkit khlieh kala pynduh ia ka jingshaniah ha ki bor jong ka ain, khamtam ha kane ka thainshateilammih ngi ka Ri India, ha kane ka thian ka jingduh ia ka jingbishar kaba hok kala pynsah dak sohkhylliang ha ki paidbah.
Ka rai jong ka iing bishar kaba ha khliehduh jong ka Ri India kala dang wanrah shuh shuh ia ka jingshah niew bein bad ka jingsngew khunswet kane ka thain shatei lam mih ngi ka Ri India, ka iing bishar kala kren shai ba lah ban bteng ia ka jingbishar lada ka sorkar pdeng ka ai ia ka jingmynjur.
Kane ka jingleh kala pynsyier ia ki duk ki rangli kane ka thain shatei lam mih ngi ka Ri India lada ki dang hap ban shaniah ha kane ka ain Yakjajor ka Armed Forces Special Powers Act (AFSPA). Na ka por sha ka por ka NESO ka dawa ban weng noh ia kane ka ain na North East.
Katei ka jingshah shiat iap ka dei kawei na ki jingpynkynmaw ia ki kam sait briew katkum ka AFSPA, kumta ka NESO ka dawa ba ka sorkar pdeng ka dei ban ai ia ka jingbit ban pynshitom ia ka kynhun shipai 21 Para (SF) kiba don kti ha katei ka jingsiat iap ia ki riew paidbah.
Ka NESO kala ong ba, lem kumta ka wanrah ia ka jingbym shaniah shuh bad jingiakynad ha North East, kane kalong katkum ka kyrwoh kaba la phah da u bah Samuel B. Jyrwa Chairman, NESO bad u Mutsikhoyo Yhobu Secretary General, NESO.
