Mawkyllei, Nailur 26: Mynta ka sngi ka party HSPDP kala rakhe kynmaw burom ia ka lyngkhuh sngi iap ba 9 snem jong u nongseng ia ka party u bah Hopingstone Lyngdoh da kaba leit buh syntiew ha dur mot ba don ha shnong Mawkylleng ha Eastern West Khasi Hills District.
Ha ka jingkren u President ka party u bah K P Pangniang, la ong ba ka party ka dang iai bat skhem ia ka nongrim kaba u nongsengia ka party ula buh, katta ka long ban pynioh ia u pud u sam ba pura, ban nym shah da lei lei ban nym shah ban tih Uranium bad ka sorkar kam dei ban khyllieh shuh ia kane bad ban dawa ia ka Khasi-jaintia State.
Ha kane ka sngi u bah Pangniang u la pynpaw ia ka jingsngew bynniaw ba wat la ka party kala pynjop bun ki MLA hynrei kaba sngewsih ka long ba ynda kila jop ki mih noh na ka party, laong ba ha kine ki 50 snem tam ka party kala pynjop palat 40 ngut ki MLA na ka party.
Ha kane ka sngi ka seng HYC mynta la khyndai snem lynter kala wan buh syntiew ban burom ia u riew rangbah ka jaidbynriew,ha ba kren ha kane ka jingialang u bah Lumlang Kharsyiemlieh President ka West Khasi Hills District la ong ba ka nongrim jong u bah Hopingstone ka long pyrshang ban iaineh bad leh hok bud dien ia kata.
U bah Lumlang u la ong ba bun ki MLA ki wan sha ka party HSPDP ha ka syrngiew jong u bah Hopingstone Lyngdoh ban ong ba ki ieid jaid bynriew tang na ka bynta ka jingmyntoi ia lade bad ynda kila jopki phet noh.
Kiwei kiba la kren ha kane ka sngi ki long u bah Methodius Dkhar MLA Mawthyngkut, ka Badariti Lyngdoh Nonglait bad kiwei kiwei ki riew rangbah ha kane ka jingbuh syntiew ban kynmaw burom ia u tei u riew rangbah ba ka jylla kala sei. Ha kane ka juh ka sngi ka seng samla jong ka party HSPDP kala leit ban buh syntiew ha dur mot jong u bah Hoping ha Mawphanlur.
