Shillong, Nailur 29: Kum shibynta ban rakhe ia ka World Tourism Day na ka liang ka Real Sports India ka ba la tip kum ka Sportive mynta ka sngi ka 27 tarik u Nailur 2024 ka la ioh ban pynlong ia ka jingiakop mareh bad iaid kjat ka ba 5 kilometer. Ia kane ka jingiakob ba la sdang na duh ka por 6baje mynstep la wan ban kaweh lama da u Amit Gupta, Assistant Director of India TourismShillong.
Ha kane ka jingiakop ki la don haduh kum ba 149 ki ba la wan ban ia shim bynta kynthup na duh ki khynnah ki ba 11 snem ka kyrta haduh ki ba 57 snem ka kyrta kynthup ia ki kynthei bad shynrang.
Ha kane ka jingia kop la ioh ruh ban sam ia ki medal bad ki trophies sha ki nongjop ha ka ba u Wankyrme u la wan ha ka kyrdan ba nyngkong kat ba u samla Donkupar ha ka kyrdan baar bad u Pinku Nath ha ka kyrdan ba lai. Kat ba na ka liang ki kynthei la rah da ka samla Uair ha ka kyrdan ba nyngkong, katba ka samla Mary Queen ha ka kyrdan ba ar, bad ka samla Angelist ha ka kyrdan ba lai.
Kum ban pynkynmaw ba ka Real Sports India ka la pynlong teng ruh ia ka Mawlynnong Runsafari ha ki arsnem bala dep kum ka dak ban kyntiew ia katei ka jaka jngohkai.
Ka jingthmu jong kane ka jingiakop ka long ban wan rah ia ka jingiajan hapdeng ki briew bad ka mariang da ka ba sumar khuid ia ka jingitynnad ki jaka jngohkai ki ba don ha kane ka jylla.
Na ka liang kane ka kynhun mynta u snem ka la pynpaw ba kan sa pynkhreh ban pynlong ia ka Mawphanlur Run Safari Marathon ia kaba ki thmu ban pynlong ha u bnai Nohprah 2024.
