Shillong, Naitung 10: Ka Deputy Commissioner jong ka East Khasi Hills District kala pynmih ia ka jingpynbna ba la ai bor ia ki magistrate, ki pulit ba kin dain kuna ia kito kiba pynkhein ia ki bthah ka tnad ka koit ka khiah ha kaba ia dei bad ki kyndon ka COVID-19 ha jaka ieng kali ha Anjali Parking Lot.
Ha ka hukum kaba la pynmih mynta ka sngi la ong ba lada lap ba ki dang bteng ban leh ia ka juh wat ha dien ba kila shah dian kuna yn khang shisyndon ia ka jingiadei ia thied ha katei ka jaka.
Ka Deputy Commissioner ka la ong ba la lap ba ki don shibun kiba leit die bad thied ia ki mar rep ha Anjali Parking Lot bun kila pynkhein ia ki kyndon ha kaba kim deng ia ki mask, ka jingailat ban pynlong ia katei ka jaka kum ka jaka ia dei iathied ia ki marrep ka long ban ban pynioh ia ka jaka kaba kylluid bad kin lah ban but ia ki kyndon bala buh ban iada na kane ka jingpang khlam COVID-19.
Hynrei na ka liang jong ka ophis kala ioh jingtip ba bun na ki nongkhaii ha katei ka jaka kim but ia ki kyndon kiba la buh, ki khelm deng ia ki mask, na ka liang ka ophis kala bthah ba kin deng arsynrtap ki mask bad ia ki bym kohnguh ym tang ba dian ia ka kuna hynrei yn pynshitom ruh katkum ka ain.
La kyntu ba baroh kito kiba leit ia die ia thied ha katei ka jaka dei ban ai Tika, ban pynsuk ia ki nongleit iew leit hat la buh ia ka jaka ai Tika ha phyllaw jong ka Anjali man la ka sngi saitjain, kito kiba khlem ai tika kin hap ban wanrah ia ka kaiphot RT-PCR man la ka shiphew sngi.
La khang pyrshah ia ki briew ba kin ia iengkai ha katei ka jaka khlem ka daw kaba biang, kiba wan ia die iathied ha katei ka jaka ki dei ban pynia jangai ar metter iwei na iwei. La bthah ia baroh ban ia bud ban lait na ka jingshah khang ka ban wanrah ia ka jingduh.
