Shillong, Nailur 19: Mynta ka sngi ki MDC jong ka liang pyrshah hapoh jong ka KHADC, hapoh ka jingialam jong ka Dr Ampareen Lyngdoh kila leit ban ai ia ka dorkhas sha u myntri ba dei peit ia ka District Council, u James K Sangma.
U nongialam jong ka liang pyrshah hapoh jong ka KHADC, haba kren ha ki lad pathai khubor ha dien ka jingiakynduh ia u myntri ba dei peit ia ki District Council, la ong ba kane ka dorkhas ka ia dei beit bad ka jingthmu jong ka sorkar pdeng ban pynkylla ia ka khyngit kaba hynriew jong ka Riti Synshar jong ka Ri India.
Ka sorkar pdeng kala wanrah ia kane ka Bill ban pynkylla ia ka Khyrngit kaba hynriew hapoh Rajya Sabha bad ka Rajya Sabha kala phah ia kane sha ka Parliamentary Stadning Committee ban bishar bniah ia katei Bill.
Ka jingsah nud ka jong ki MDC ka liang pyrshah ha KHADC ka long ha kaba ia dei bad ki briew kiba khlem pat don nongmihkhmat hapoh jong ka KHADC, ka sorkar pdeng kala buh ia kane kyndon ban thung ia ki kum ki MDC. Na ka liang jong ka seng Congress ka pyrshah ia kane ha kaba ia ka dorkhas la ai sha u myntri ba dei peit ia ki District Council.
Na ka liang jong ka Dr Ampareen Lyngdoh kaba don lang ha kane ka sngi kaba la ialam ia ki MDC sha u myntri ka District Council, ka la ong ba ki kwah ruh ba ka sorkar ka dei ban pynkylla shuwa ia ka hukum jong u president 1950 namar ha kane ka hukum ka long ba ki don 50 tylli ki jaidbynriew riewlum ha kane ka jylla.
Ka la ong ba naduh ba la pynlong ia ka Khyngit kaba hynriew ha u snem 1947 kane ka dei ka sien kaba nyngkong bala wanrah ia ka jingpynkylla kumta na ka liang jong ka party Congress ka shem ba ki don bun ki jingduna ia kaba ki ruh ki kwah ban kdew khnang ba ka jingpynkylla kan nym ktah ia ka jaidbynriew.
