Shillong, Nailar 17: Ka All Meghalaya SSA School Teachers Association (AMSSASTA) kala phah ai ka jingthoh sha u myntri rangbah ka jylla lyngba u symbut myntri rangbah ka jylla u bah Prestone Tynsong ha ka jingiakynduh ha ophis trei kam ka jong u ha ka sngi thohdieng ka 16/Nailar/2024.
Ha kane ka jingthoh kaba la phah sha ka sorkar kila buh ia ka jingdawa ban pynkiew noh ia ka tulop jong kid a 100%. Katkum ka jingkhien kaba kila ai ka long ba ha u snem 2008 la pynkiew na ka T.1500/- sha ka T.3000/- tyngka kata 100% ha dien saw snem.
Ha u snem 2010 na ka T.3000/- la pynkiew sha ka T.6000/- tyngka kata 100% ha dien ar snem, ha u snem 2013 na ka T.6000/- tyngka la pynkiew sha ka T.9,200 bad T.9, 900/- tyngka kata ka long 53.33% bad 65% ha kata ha dien lai snem.
Ha u snem 2026 na ka T.9,200/- bad T.9,900/- la pynkiew sha ka T.19,044/- bad T.20,493/- tyngka ha kaba ka jingkiew ka long 107% ha dien saw snem Ha u 2017 haduh Nailar 2024, ha dien phra snem ka sorkar kam pat pynkiew ia ka tulop jong ki nonghikai SSA.
Ka seng kala thoh bun sien sha ka sorkar bad ha ka jingthoh kila pynpaw ba ka lawei jong ki nonghikai SSA ki dang ha jingdum namar kane ka kam hikai SSA ka long kum kaba trei kontrak bad kane ka wanrah ia ka jingbym sngewshngian.
Ka seng kala kdew ba kum ka jylla Arunachal Pradesh, Union Territory Kashmir bad ka jylla Assam dang shem kila shim ia ki nonghikai SSA kum ki nonghikai ka tnad pule puthi jong ka sorkar jylla, kumba ka long ki nonghikai kila pynbiang ia baroh ki jingdon kam kum ki nonghikai.
Ha katei ka jingia kynduh na ka liang jong u symbut myntri rangbah ka jylla u la shah skhor ia ka jingpynsngew jong ki nonghikai SSA. Ia ka ka jingthoh kaba la phah sha ka sorkar kala soi da u bah Peter Thyrniang President, bah Wanpyndaphi Lapang Joint Secretary bah Umningstone Paliar General Secretary.
