Shillong, Iaiong 11: Ka Khasi Students’ Union Central Executive Council lyngba ka Cultural Cell ka ai Khublei Shad suk mynsiem ba suk ba kmen ia ki Parakur-Parakha ki khun samla kynthei bad shynrang kiba ia shim bynta ban ïa mih lympung ha katei ka shad ka kmen ryngkat la ka riam ka beit Khasi tynrai ba pura.
Kane ka long khnang ban pynphuh pynphieng ïa ka Shad ka kmen u Khun Khasi Khara kaba ju long shisien shi snem ha Madan Shad Weiking, kum ka dak ban ai nguh ai dem ïa U Blei Trai Kynrad U nongthaw nongbuh.
kane ka Shad Suk Mynsiem ba la pynlong da ka Seng Khasi, kaba la ju tip kum ka Shad Weiking kaba la ka ba long ruh ka wei na ki jingshad ba pawnam jong u Khun Hynñiewtrep kaba pynneh pynsah ruh ia ki dienjat kaba ki long shuwa kila ai pateng ha ngi kiba mynta.
Ai ba kane ka Shad Ainguh kaba la sdang naduh 10 tarik u Iaiong bad kaban kut ha ka 12 tarik kan long shisha kaba i shongkun bad Shong Blei ha kaba u Blei Trai kynrad un da hiar ka kyrkhu kyrdoh ia ki khun ki Hajar ka Bri u Hynñiew Trep, la ong u samla Barikular Nongsiej shongknor ka Cultural Cell KSU.
