New Delhi, Jymmang 09: U Myntri Rangbah duh jong ka Ri India u Narendra Modi haka kyrteng ki paidbah jong ka ri baroh kawei mynta ka sngi u la phah ia ka jingai khublei kaba kyrpang ia u Kpa Bakhuid u pope Leo XIV kum u khliehduh jong ka balang Katholik.
U Myntri rangbah duh ka Ri India la kdew ba u kpa bakhuid u dei u briew ba ialeh ban wanrah ia ka shongsuk shongsain ha ka pyrthei, ka jingialong kawei, ka jingiamynjur lang bad ka jingshakri ia u para briew, ia kane la buh ha ka X kaba u myntri rangbah duh ka Ri India u pyndon kam.
Ha ka kyrteng ki paidbah jong ka Ri India u phah ia kane ka jingai khublei kaba kyrpang ia u kpa bakhuid u Pope Leo XIV, hapoh ka jingialam ka jong u ia ka balang katholik ka wan ha ka por kaba biang bha ba ka pyrthei ka don kam ia ka jingshong suk, ka jingialong kawei, ka jingiamynjur lang.
U Myntri Rangbah duh jong ka Ri India u la ong ba kum ka ri kan dang iaid bteng ia ka jingia dei bad ka nongbah Vatican ban ia phylliew jingmut ha kiba bun ki liang bad ban ia ai jingmut lang ha kiba bun ki bynta.
