Aiti u myntri rangbah ka jylla u Conrad arklur sha ka Robert Hospital na ka skhim MHAP

Shillong,Jymmang 14 : U Myntri Rangbah ka jylla u Conrad K Sangma mynta ka sngi u la pyllait paidbah ia ka Development Fund kaba la kot haduh 2 klur kaba hap hapoh ka Meghalaya Healthcare Advancement Policy (MHAP) 2024 sha ka Dr. H. Gordon Roberts Hospital, Shillong.
Ka jingthmu jong ka jylla ban pyndap ïa ki jingduna kiba kongsan ha ka koit ka khiah bad ban kyrshan ïa ki hospital ba la pynïaid da ka mishon kiba la shakri slem bha ïa ki paidbah ka Meghalaya.
Haba kren kum u Kongsan, u Myntri Rangbah u la pynpaw ka jingsngewnguh ïa ki kam ba la leh da ki jaka mission bad u la pynpaw biang ïa ka jingangnud jong ka sorkar ban pynkhlain ïa ka jingai jingsumar ha kylleng ka jylla.
U la pynpaw ba ka Meghalaya mynta ka pynlut palat 8.5% na ka mang tyngka baroh ha ka koit ka khiah— kaba heh tam napdeng ki jylla baroh ha India bad u la bynrap ba kane ka jingbei tyngka kaba ïai bteng ka ai ïa ki jingmih kiba lah ban ïohi, khamtam eh ka jingpynduna palat 45% ïa ka jingïap jong ki longkmie, kaba la khring ïa ka jingpyrkhat jong ka ri bad ka pyrthei.
“Ngim don hangne tang na ka bynta u snem 2024. Kane ka dei ka jingïatreilang na ka bynta bun bun snem bad kane ka hospital ka lah ban rai kumno ban pyndonkam ïa ka pisa la ka long ha ki jingtei, ki tiar ICU, ne ki jaka thymmai, ka pisa ka dei ka jong phi ban pynïaid ha ka jingstad jong phi,” u la ong.
Ha kane ka prokram la pyniaid da u Rev SS Majaw bad la ioh ia ka jingdwai na u Pastor K Laloo uba dei u Secretary jong ka Central Organizing Committee, u Dr Nongpiur, u Bah KW Marbaniang uba dei u Administrative Officer nalor kiwei pat kiba la ia donlang.