Shillong, Jymmang 15: Ka LD Ventures kaba pyniaid ia ka Miss Universe Meghalaya 2026 bad ia ka Miss Teen Meghalaya 2026 kila pynithuh ia ki nongjop ha kane ka jingiakop thei bhabriew ha kitei ki ar tylli ki jingiakop bad kine ki nongjop kin mih khmat ia ka jylla Meghalaya ha ka jingiakop thei bhabriew ha Ri India.
U bah Brian Wahlang u ba dei u State Peagent Coordinator haba kren ha ki lat pathai khubor ha Shillong Press Club ha ka 14/Jymmang/2026 u la iathuh ba ka samla Sanwaka Surong kaba jop ia ka Miss Meghalaya 2026 kan mih khmat ia ka jylla Meghalaya ha ka jingiakop Miss Universe India 2026 bad ka Miss Teen Meghalaya 2026 ka samla Odarica Kamar War kan mih khmat ia ka jylla Meghalaya sha ka Miss Teen India 2026.
U bah Brian u la iathuh ba kine kin sa leit shah hikai pyntbit shuh shuh shabar ka jylla ha ki nonghikai kiba kham tbit namar kane ka jingiakop thei bhabriew ha ka Ri India kan sa long hapdeng u bnai Jylliew, Naitung, bad Nailar. Na ka liang jong ki nongpyniaid na kane ka jylla ki don ka jingkyrmen skhem ba kin poi sha ka thong wat la ka jingiakop kan long kaba jwat.
U bah Brian u la ai ka jingkhublei ruh ia ka Dr. Tanawi Marak kaba la rah ia ka jylla Meghlaya sha ki rynsan kiba kham shalor, la iathuh ba kila ju phah ia ki thei samla kiba tbit sha kine ki rynsan jingiakop thei bhabriew bad ha kane ka kynti kaba mynta ka Tanawi kala ioh kala wan ba ar ha kane ka jingiakop bad kane baroh ka dei namar ka jingtrei shitom jong ka bad kala wanrah nam ruh ia ka jylla.
Ha kane ka sngi na ka liang jong ki nongjop ka Miss Meghalaya bad ka Miss Teen Meghalaya kila pynpaw ia ka jingsngewkmen jong ki ba kin ioh ia kane ka lad ban mihkhmat ia ka jylla bad kila pynsngew ba kin trei shitom ban wanrah ia ka jingjop bad ka burom ia ka jylla.
