Shillong, Nailar 24: Ki nongialam ka Joint Action Commitee Against Umngot Hydro Power Project ki la pynpaw ia ka jingkyrmen ka ba khraw hadien ba u symbud myntri rangbah ka jylla u bah Prestone Tynsong u la kular ban rah ia ka ne ka mat ban iatai sani bha hapoh ka jingialang jong ki kynhun myntri bad ki khmied lynti ruh ba hapoh ka shibnai ka sorkar kan lah ban weng noh ia ka ne ka jingthmu ban shna ia kane ka project .
Ka kynhun ki seng bhalang hapoh ka lama jong ka JAC Against Umngot Hydro Power Project ka la pynpaw ia ka jingpyrshah jong ki halor ka jingthmu jong ka sorkar jylla ban den ia ka wah Umngot na ka bynta ka Umngot Hydor Power Project ka ba la sdang ban paw pyrthei naduh u bnai Iaiong mynta u snem.
U bah Kitbok Ryngksai u Secretary ka JAC u la pynpaw ia ka jingsngewkmen halor ka jingkular jong u Symbud Myntri rangbah ka jylla ba yn shim khia ia ka ne ka bynta ba yn rah ia ka ne ka mat ban ia kren hapoh ka jingialang jong ki kynhun myntri .
U bah Ryngksai u la ong ba kila sngew kmen ba na ka liang u symbud myntri rangbah u la kular ban rah ia ka ne ka mat hapoh ka jingialang jong ki kynhun myntri bad ban bishar bnaih ba lada ka ne ka project ka ktah ia ki paidbah ia ki nongrep na ka liang ka sorkar ka kloi ban weng noh ia ka ne ka jingthmu ban den ia ka ne ka wah Umngot.
U bah Allan West Kharkongor u la pynpaw ba ka jylla ka don lai tylli ki spah ba kordor ka wei ka long ka Jingkieng jri , ka jingpaw ka Mawlynnong, bad ka dei ka Wah Umngot.
u la ong ba ha kane ka jingiakynduh u la pynsngew ia u Symbud Myntri rangbah ba ka jingsngewkhia kam dei tang na ka bynta ki briew ba im ha mar shilliang ka Wah Umngot hynrei lada den ia ka Wah Umngot kan wan rah ia ka jingduh nong ka ba khraw ia ki nongtrei ha ka Tourism.
