Shillong, Lber 19: Ka Chairperson jong ka Meghalaya State Commission for Protection of Child Rights ka Agatha K Sangma kala pynrem jur ia ka jingjia ha Karnataka ha kaba ar ngut ki khynnah na ka jylla ki la duh ei ia la ka jingim ba kynthup ia iwei na Lyndem, Pynursla bad iwei na Sohparu, Nongstoin.
Ka State Commission ka pynrem jur ia kito kiba donkti ban iuhroit ia ka hok jong ki khynnah bad ka commission ka iatreilang bad ka Karnataka State Commission for Protection of Child Rights ban pynthikna ia ki lad pynshitom ia kito kiba donkti bad ruh ban iarap ban peit ia ka koit ka khiah bad ka bha ka miat jong ki 22 ngut kiwei pat ki khynnah na Meghalaya kiba la shah ktah ha kane ka jingjia.
Ka MSCPCR ka la kyrpad ia ka Karnataka State Commission for Protection of Child Rights ban ai ia ka kaiphod ba bniah ban lap ia ki jingduna kiba wanrah ia ka jingpynkhein ia ka hok iada ia ki khynnah.
