Shillong, Nohprah 07: Mynta ka sngi ki paidbah jong ka nongbah Shillong kila ia shim bynta lang ha ka jingthang mombati ha Khyndailad kaba la pynlong da ka All India Trinamul Congress ban pynpaw ia ka jingsngewlem ia kito ki riew paidbah kiba la khlad ha ka jingshah siat ha ki shipai ha Mon District ha ka jylla Nagaland
U President jong ka All India Trinamul Congress (AITC) ka Meghalaya State Unit u bah Charles Pyngrope la ong ba ka jingpynlong ia kane ka jingthang mombati mynta ka sngi ha khyndailad ka long ban pynpaw ia ka jingsngewlem sha kito kiba ha iing ha sem kiba la khlad noh ia kiba ieit ba thoin ha ka jingshah siat ha ki shipai Assam Riffle.
Kane ka jingpynlong ia kane ka jignthang mombati ka long ban ioh ia ka jingshai kaba bniah ha kaba ia dei bad katei ka jingjia ha Nagaland khnang ba kum kane ka jingjia kan nym jia shuh ha dien ha bud ha kiwei kwei ki jaka ruh kum juh.
U Nongialam ka AITC hapoh ka iing dorbar thawain ka jylla u Dr. Mukul Sangma la ong ba lada ki sorkar jylla ki lah ban tehlakam ia ki jingiakhih hapoh ka jylla u la ong ba um iohi ba don kam ban pyntrei kam ia kane ka ain AFSPA bad la jylla Meghalaya kala pyni ia ka lynti, lada lah ki jylla ban pyntrei kam ia kane ka ain ym don kam ha kano kano ka bynta jong ka Ri India.
Dr. Mukul la ong ba man ka por ba ki don ka jingialang bad ka sorkar pdeng halor ka shong suk shongsain la juh pynpaw ia ka jingsngewkhia bad la ia kren kumno ba leh ha kaba ia dei bad ka jingia khun pyrshah ia ki kam huri hura kiba mih ha kano kano ka jylla lada dei bad ki kam lehnoh ruh kum juh.
Ban ia khun ia ki kam lehnoh ha kane ka dong shatei lam mih ngi jong ka Ri India ka long kaba eh bha, hynrei ka jylla Meghalaya kala pyni ia la lynti khlem da pyntreikam ia kane ka ain yakjakor ha ka jylla bad ka sorkar pdeng ka dei ban iohi ia kane ha kaba iakhun ia ki kam lehnoh.
Ha kane ka jingthang mombati la don lang ruh kiwei ki MLA ka party, u hab Himalaya Shangpliang, bah George B Lyngdoh, ka Dikanchi Shira, u Winnerson Marak, u Zenith Sangma bad kiwei ki nongialam ka party kila don lang.
