Shillong, Jylliew 2: Ka shongknor jong ka Assembly Committee for Empowerment of Women (ACEW) ka Dr. Ampareen Lyngdoh mynta ka sngi kala thoh da ka shithi sha u Lamphang ka iing dorbar tahwain ka jylla u ban dawa ba dei ban weng ia u Thomas A Sangma MLA jong ka 50-North Tura na ka Assembly Committee on Estimate halor ka jingshah kynnoh ba la leh beijot ia kawei ka kynthei.
Ha ka shithi ba ka Dr Ampareen kala thoh sha u Lamphang ka iing dorbar kala ong ba kyrmen skhem ba phi la tip ia ka khubor ba kala don ka jingshah kynnoh pyrshah ia u MLA jong ka 50-Norh Tura u la leh beijot kawei ka kynthei bad kane kala pynkyndit ia baroh.
Ha ka shithi ka Dr Ampareen kala kdew ba katkum ki ain ba long pyrshah ia ki kam thombor ia ki kynthei kila don, kumta la dei ban ai ia ka jingbishar kaba beit na ka bynta kane ka kynthei kaba la wan sha khmat ban pynpaw ia ka jingshah leh beijot kumba la kynnoh.
Ban ioh ia ka jingbishar kaba khuid bad kaba khlem shah liang dei ban weng ia u dkhot ka iing dorbar kum u shongknor jong ka Assembly Committee on Estimates (Constituted unde rule 242(1), kum u dkhot jong ka ACEC ha duh ba ki pulit lane ka jingbishar kala dep.
Ka Dr Ampareen kala pynkynmaw ba kala don ka jingweng ia u dkhot ka iing dorbar ka ka Assembly Committee ia u bah Julius Dorphang MLA ha u snem 2017 ha ka por jong u AT Mondal ha dien ba u la shah ai ejhar ha kaba ia dei bad ki kam leh beijot.
Kawei ka kynthei samla kaba dei na kane ka nongbah Shillong kala ai da ka Ejahar pyrshah ia u Thomas A Samgma bad ha ka ejahar kala kynnoh ba kala shah leh beijot ha u tei u rangbah la shisnem ei ei bad mynta kala armet, ia kane ka ejahar la ai ha ophis jong u Superintendent ki pulit jong ka East Khasi Hills District.
