Shillong, Risaw 04: Ka District magistrate jong ka East Khasi Hills District kala ong ba namar ba la test COVID-19 Positive 29 ngut hapoh ka shnong Shiliang Jashar kaba hap hapoh jong ka Pynursla Block, kumta la pynbna ba ia kane ka shnong kum ka “Contianment Area”.
Kane ka jingpynbna “Containment Area” ia kane ka shnong ka long ban iada na ka jingsaphriang shuh kane ka jingpang COVID-19 bad ha ka juh ka por ban ailad ia ki nongtrei ka tnad ka koit ka khiah ban ia kynduh bad kito ki briew kiba don ka jingiajan bad kiba long positive.
Ka District Magistrate kala pynbna “Containment Area” ia ka shnong Shiliang Jashar naduh mynnin ka sngi Saitjian 3/10/2020. La pynbna ruh bala khang ia ki briew ban ia rung ia mih ha kane ka jaka. La khang ia ki briew ba kin rung sha kane ka shnong bad ki nongshong shnong ruh la khang bakin mih sha bar jong ka shnong.
Ha ka juh ka por la bthah ia baroh ki nongshong shnong ba kim dei ban mih bad ki dei ban shong hala ki jong ki iing ki sem. Baroh ki dukan, ki jaka pule kiba hap hapoh kane ka jaka la bthah ba kin khang haduh ban da pynbna da kumwei pat.
La khang pyrshah ban pynlong kino kino ki jingialum paidbah hapoh katei ka thain, la bthah ia u Block development Ophisar jong ka Pynursla ban peit ia kane ryngkat ba u Medical ophisar bad ki pulit ban kin pyntip paidbah ia kane, kane ka hukum kan nym khang ia ki nongtrei ka tnad ka koit ka khiah, nalor kita lada don ban pynkhien kin shah pynshitom hapoh jong ka ain Disaster Management Act, 2005 bad ki kyndon jong ka I.P.C.
