Shillong, Lber 15: U Director jong ka tnad pule jong ka sorkar Meghalaya ba dei peit ia ka Higher bad Technical education u la thoh sha u Managing Director jong ka kompeni shon kot ka Kalyani kaba don ha nongbah Delhi ba ki dei ban pynmih ia ka jingpynshai paidbah bad weng noh na ka jingdie ia kane ka kot “ISC Sociology” kaba pule ki klass XII.
Ha ka shithi kaba la phah sha katei ka kompeni pynmih kot, la thoh ba ha ka kot kaba kila pynmih “ISC Sociology” ha ka sla kaba 1.37 bad 1.38 kaba la thoh da u Manjir Ghosh ka long ka jingthoh kaba long pyrshah ia ka dustur ki khasi bad katkum kane ka jignthoh ka ialam bakla ia ki paidbah.
Ia kane ka kot la die paidbah bad kane kala ialam bakla shaphang ka jinglong jingman jong ki khasi baroh kawei. Na ka liang jong ka sorkar Meghalaya kala bethah ba ka kompnei ka dei ban pynmih ia ka jingpynshai paidbah halor kane ka bynta.
Ha ka juh ka por ka kompeni ka dei ban shim ia kilad ki lynti baroh ba dei ban pynsangeh noh ka jingdie ia kane ka kot sha ki khynnah pule lada kim leh kumta kin ujor pyrshah sha kashari. Ia kane ka shithi la phah ha ka sngi thohdieng na ka tnad pule puthi jong ka sorkar jylla.
