Shillong, Naitung 05: Ki paidbah kiba iaid na ka surok Mawsynram sha Balat ki buh ka jingkylli ba balei ka PWD ka pynsangeh ban trei pyndep ia ka jingkieng ha riat Mawniuh kaba ki paidbah nongshong shnong katei ka thain ki kwah ban tip.
Ka jingkieng ha riat Mawniuh ka dei kaba la shna thymmai da ka jingkieng dewbilat ia kaba la lah ban pyndep ia ka jingkieng, hynrei ban iaid kali pat ym lah namar ba ka PWD jong ka Mawsynram Division kam shym la pyndep na shilliang jong ka jingkieng ban rah ia ka surok.
Ki kali kiba iaid mynta baroh ki hap ban iaid na ka jingkieng kaba rim ka jingkieng dieng ia kaba la sator bha. Ki paidbah ki kwah ban iohi ba ka sorkar lyngba ka tnad PWD ka dei ban shna pyndep ruh ia ka jingkynton na shiliang ka jingkieng ka bynta ba sharum, khnang ki kali kin ioh ban iaid noh na kane ka jingkieng kaba thymmai.
Na Mawsynram sha Dangngar ka jingdieng kaba dang iaid ki kali dei sa tang kane kaba ha riat Mawniuh bad ka dei ruh ka surok kaba khien namar ka dei ha pdeng jong ka riat, ki paidbah kila kmen ban iohi ba ia ka jingdieng dewbilat la dep ban shna, hynrei mynta la jan shisnem ia ka kynton ka PWD kala sangeh ban shna. Na ka liang ki kwah ban ioh ba ka PWD ka dei ban pyndep noh ia kane ka jingkieng kaba don kam bha ia ki paidbah ha katei ka thain.
