Shillong, 11 Nohprah: Ban pynbiang ia ka Network jong ki mobile ha kane ka jylla Meghalaya, ka jylla ka dang don kam ban don sa 2000 tylli ki mobile tower ha ka jylla baroh kawei ban leh ia kane ka sorkar kala pdiang ia ka policy ka Meghalaya Telecom Infrastructures Policy 2018.
Da ka jingwanrah ia kane ka policy kala ailad ia ka sorkar jylla ban shah ia ki mobile company kaba kin buh ia ki tower jong ki ha kit num iing jong ki ophis sorkar bad kane kam naduh ka 15 tarik Kyllalyngkot 2019.Hadien ba la iathit bniah ia kane ka policy ba la wanrah na ka tnad Information Technology, ka sorkar ka la pdiang ia kane ka policy, la ong u bah Prestone.
U bah Prestone u la ong ba kane ka policy ka long ban pynkhlain ia ka network ha kane ka jylla ha kaba kiwei ki kompeni ki lah ban pyndonkam ia ka network na u tower jong kawei pat ka kompeni. La iathuh ba haduh mynta ka jylla Meghalaya ka la donkam ban thung tower haduh 2000 tylli na ka bynta ban pynbiang ia ka network.
Ha kawei ka liang, ka kynhun myntri ka la pdiang ruh ia ka jingpynkylla ia ka kyndon 5, ka Lokayukta Act khnang ban ailad ia u chairman ban treikam pura watla ym pat don ki dkhot ba pura bad ia kane yn pynbna da ka Ordinance.
“Ngi la pdiang ban pynbeit ia kane ka kyndon khnang ban ailad ia u chairman ban treikam khlem pat don ki dkhot baroh bad namar ba ym pat don dorbar, yn sa pynmih shwa da ka ordinance”, la ong u bah symbud myntri rangbah.Ka sorkar jylla ka la pdiang ia ka jingpyntreikam ia ka jingsiew tulop ia ki nonghikai college katkum ka 7th pay commission ka sorkar pdeng.
Haba pyntip ia kane, u symbud myntri rangbah u bah Prestone Tynsong u la ong ba lyngba kane ka rai jong ka sorkar, kan ai ia ka jingsiew ba thymmai ia ki 112 ngut ki nonghikai kolej sorkar bad 605 ngut ki nonghikai kolej bym dei sorkar kiba don ha ka jylla. Kane kan treikam naduh ka 1 tarik Kyllalyngkot 2016 bad kan lut kumba T. 5,85,69,948 klur .
