Shillong, Nailar 19: U bah Charles Marngar MDC jong ka Mawhati u la iakynduh ia u myntri rangbah ka jylla u Conrad K Sangma ban kyntu ban ia kren bad u myntri rangbah ka jylla Assam ban weng ia ki pulit CrPF na ka shnong Umlaper kaba ka jylla Assam kala buh ha katei ka jaka.
Haba kren ha ki lat pathai khubor ha dien ka jingiakynduh ia u myntri rangbah ka jylla u bah Charles Marngar u la iathuh ba u la ioh ia ka jingtip ba ha ka 13th Nailar 2021 ba ka jylla Assam kala wan buh ia ki pulit CrPF hapoh ka shnong Umlaper kaba hap hapoh jong ka Ri Bhoi District.
Kane ka jaka ka dei hapoh ka jingiakam markylliang hapdeng ka Assam bad ka jylla Meghalaya kaba hap hapoh ka raid Nongtung jong ka hima Khyriem Syiemship, halor katei ka jingtip u MDC ka Mawhati u la leit da lade ban lap ia kane ka jingshish bad u la lap ba ki don ki CrPF.
“Nga la pyntip ia kane sha ka u Deputy Superintendent ki pulit jong ka bad la iahtuh ia nga ba kala don ka jingiakren hapdeng u Superintendent ki pulit jong ka Ri Bhoi District bad Superintendent ki pulit ka Hamren bad ka jingiakren ka long bala buh ia ki tang na ka bynta kane ka jingiada ha ka sngi rakhe ia ka jinglaitluid ka Ri India bad ym weng ia ki ha ka 16 tarik hynrei khlem weng haduh mynta ka sngi”, la ong u bah Charles.
Ka jingwan jong u ban ia kynduh ia u Myntri Rangbah ka jylla mynta ka sngi ka long ba pynsngew ha u ba kala don ka jignthud ha ka leit ka wan ki paidbah da ka jingdon ki CrPF bad ki pulit ha Umlaper bad Ummat, ha kane ka jingiakynduh u myntri rangbah ka jylla u la kular ban tuklar ia kane ka kam.
Ka jingwan ia kynduh ia u mytnri rangbah ka jylla halor kane ka bynta ka long namar ba kane ka jaka ka don ha pdeng ka jingiakam mar kylliang, kane ka jingwan buh CrPF ki pulit Assam katei ka jaka ka long ba ka Assam ka wan ban kam ia katei ka jaka kaba don ha jingiakam mar kylliang ia kaba ym pat lah ban ia pynbeit.
Ha kane ka jingiakynduh na ka liang jong u mytnri rangbah ka jylla u la ai ka jingkular ia u MDC ka Mawhati ban yn sa ia kren ia kane ka kam bad u mytnri rangbah ka jylla Assam halor kane ka jingwan buh ia ki pulit CRPF ha katei ka jaka ha Umlaper.
