Shillong, Naiwieng 29: Mynta ka sngi u lamphang jong ka Khasi Hills Autonomous District Council u bah Pynshngiang Syiem u la phah ia ka shithi sha u myntri kam poh iing ka Ri India u Amit Shah ba ki kwah ban ia kynduh ia u ban ia kren halor ka Citizenship Amendment Bill kumba u la khot ia ka jingialang la shai ka sngi.
Katkum ki thymmei khubor kiba la lah ban ioh la iathuh ba ha kane ka jingialang kaba u myntri kam poh iing u la khot ia ki seng sain pyrthei bad ki seng bhalang ban long la shai ka sngi ban ia kren ia ka CAB, ia ki District Council jong ka dong shatei lam mih ngi jong ka Ri India kam shym la don ka jingkhot.
Katkum ki thymmei khubor kiba u SP News Agency u la ioh ba na ka liang jong u lamphang jong ka KHADC u la thoh ia ka shithi sha u myntri kam poh iing jong ka Ri India ban kynthup lang ia ka KHADC ha ka jingialang ka long la shai ka sngi halor ka CAB.
Katkum ki lad khubor kiba la ioh la sngewthuh ba mynta ka sngi u lamphang jong ka iing dorbar ka KHADC u bah PN Syiem, u CEM jong ka KHADC u Bah Latiplang Kharkongor kila leit sha Delhi ban ioh ia kynduh ia u myntri kam poh iing ka Ri India halor ka CAB.
La ioh jingtip ruh ba nalor jong u lamphang bad u CEM jong ka KHADC, kiwei ki dkhot jong ka kynhun UDF kiba la ia leit lang ki long u Bah Lamphrang Blah, Bah Alvin K Sawkmie, Bah Balajied Ranee, Bah Karnes Sohshang, Bah Mitchell Wankhar, bah Grabiel Wahlang bad kong Macdaylne M Mawlong.
