Shillong, Lber 16: U Shongknor jong ka iing dorbar thawain u Bah Metbah Lyngdoh ka jylla mynta ka sngi u la pynsangeh shikynta ia ka jingiashong dorbar bad ha kane ka jingpynsangeh u la khot ia ka jingialang ia u myntri rangbah ka jylla u Conrad K Sangma, ia u nongialam ka liang pyrshah hapoh ka iing dorbar u Dr Mukul Sangma ban ia kren ia ki kam kiba kyrkieh.
Ha kane ka jingialang na ka liang jong ka sorkar la don lang u symbut myntri rangbah ka jylla u Bah Prestone Tynsong, u Myntri ka koit ka khiah u bah AL Hek bad u bah Balajied kupar Synrem MLA, na ka liang pyrshah la don lang u bah Charles Pyngrope MLA.
Haba la sdang biang ia ka jingiashong dorbar u shongknor jong ka iing dorbar u la pynbna hapoh ka iing dorbar ha ba ha dien ba la khot ia ka jingialang na baroh arliang la shim ia ka rai ba ka jingiahsong dorbar kan long noh sa tang ha ka 19 tarik mynta u bnai. La pynsngew ba ia kane ka rai la shim ban ban iada na ka jingpang COVID-19.
