Shillong, Iaiong 28: Ka seng samla pule na Jaintia Hills ka Jaintia Students Union (JSU) mynta ka sngi kala leit ban ai da ka jingthoh sha u Superintendent ki pulit ka East Jaitnia Hills District ban dawa ba dei ban pynkhlain ia ki lat jingiada na ka jingwan rung beain ki mynder.
Ha ka shithi ka seng kala pynpaw ia ka jingsngew khia kaba jur ban iohi ia ka jingwan rung tuh ki khar Bangladesh lyngba ka East Jaintia Hills District , kumba ka paw ka long la ki don ki trai jylla kiba don kti lang ha kaba pynrung ia ki khar Bangladesh bad kane ka long kaba ma.
Ha ka shithi na ka liang jong ka JSU kala ai jingmut halor ki lai tylli ki mat ba kumno ban pynkhlain ia ki lat jingiada ha kaba ia khun pyrshah ia ka jingwanrung tuh ki khar Bangladesh sha kane ka jylla.
Ka JSU kala ai jingmut ban dang pynkhlain ia ki khyrdop ban talasi ia ki mynder ri, dei ban khynra ia ki kali kiba iaid bad la don kano kano ka jingisuba ba don ki mynder ri, ka dei ban don ka jingiatreilang ha pdeng ki Pulit bad ki BSF ban khanglad ia ki khar Bangla ban ioh rung sha jylla.
Kum ka seng ka khmih lynti ba ka don ka jingiatreilang ha pdeng ki Pulit bad ki BSF ban ia khun pyrshah bad bad khanglad ia ki briew kiba wan rung beain sha kane ka jylla Meghalaya la ong ka JSU.
