Shillong, Kyllalyngkot 17: Kum shi bynta ban pyllait iaki kali heh ban iaid nalor ka Jingkieng Dam Umiam, ka Sorkar Jylla kala shim iaka rai ban thaw noh daka Surok thymmai na Umiam ban mih sha Nongbah Shillong.
Ïa kane ka sienjam ka Sorkar kala shim ruh ban pynthikna iaka ka jingshngain jong ka Jingkieng Dam kaba dang shu dep maramot.
Ïa kane ka rai la shim haka jingïalang bishar kam da u Symbud Myntri Rangbah ka Jylla u ba khmih iaka tnat PWD (Road) u Bah Prestone Tynsong bad ki heh ophisar ka tnat National Highways & Infrastructure Development Corporation Limited (NHIDCL), PWD lem bad kiwei kiwei.
Haba kren sha ki lad pathai khubor u Bah Prestone Tynsong u la ong “Haka jingïalang ngi la iakren sani bad ngi la rai ba u Chief Engineer ka National Highway (Roads) un sa shong jingialang biang bad ki Consultant bala thung da ka NHIDCL ha ki khyndiat sngi ban wan ban shim rai ia ka lynti thymmai”
U Bah Prestone u la ong ba hadien ka jingïalang hapdeng u Chief Engineer ka National Highway (Roads) bad ki Consultant ka NHIDCL, ka Sorkar kan sa shim rai ia ka lynti ban pyniaid ia ka surok thymmai (alignment) khnang ban pynkhreh ia ka detailed project report (DPR)
