Shillong, Lber 03: Ban pynnneh ia ki tyllong um ka sorkar lyngba ki tnad sorkar bapher bapher kin pynlut kumba T.4000 /- klur tyngka ban ialeh ban pynneh pynsah ia ki tyllong um kiba don palat 70,000 tylli ha ka jylla, kane ka dei ka jubab U Myntri Rangbah ka jylla U Conrad K Sangma ia ki jingkylli u bah H.S Kharpran MLA ka Mawryngkneng.
U Myntri Rangbah u la iathuh hapoh ka iing dorbar ha kine ki san snem ka sorkar la dep ban shna ia ki jingtei ban iada ia ki tyllong um kila long baroh 1601 bad ka jinglut ka la kot sha ka T.46.62/- klur tyngka, kane ka pisa la bei lyngba MNREGA skhim.
Haba jubab ia ki jingkylli bynrap, U Myntri Rangbah u la pyntip hapoh ka iing dorbar ba na ki 70,000 tylli ki tyllong um, la dep ban jurip 55,000 tylli bad na kine la shem ba 792 tylli ki tyllong um ki lah ban duh noh.
U Myntri Rangbah u la ong ba ki don bun tylli ki tnad sorkar kiba iatreilang kumno ban pynneh ia ka um, kum ka PHEs, tnad pynneh khyndew, tnad rep, tnad pynneh um, tnad khlaw bad kiwei ruh, haba shim lang ia ki jingkhein na kitei ki tnad sorkar ka pisa baroh kala kot sha ka T.4000/- klur tyngka, kane ka long kumno ban pynneh ia ki tyllong um.
U Myntri Rangbah u la iathuh ba ka sorkar jylla kan ioh ia ka pisa 62 million dollar kaba mut kan long T. 516/- klur tyngka bad na kane kan long kumba T.400/- klur ka kran na ka sorkar pdeng, kane ka pisa ka wan lyngba ka Asian Development Bank, kane ruh yn pynlut ha kaba pynneh ia ki um ki wah.
U Myntri u la ong ba ka jylla Meghalaya ka ioh ia ka um slap 63 billion square cubic metre, hynrei 30 billion square cubic metre ka tuid sha Bangladesh bad 30 billion square cubic metre ka tuid sha Assam, dei ha kane ka rukom ba ka sorkar la shim bun ki lad ki lynti ban pynneh pynsah ia ki tyllong um.
