Shillong, Naitung 17: Ka Khasi Jaiñtia Presbyterian Synod Sepngi (KJPSS) lyngba ka Agency for Sustainable Development Initiative(AFSDI) kan pynlong ïa ka Shillong Run 10K – 2024 ha ka 3 u Nailar 2024 ha ka por 5:30 mynstep ha Parking Lot, Polo. Ka phang jong kane ka jingia marehthong ka long “Run With Different Abilities”.
Ha ka jingiakren bad ki nongthoh khubor ha shillong press club mynta ka sngi ka 16 tarik u Naitung 2024 na ka liang u Rev Bidonbok Syiem u la ong ba ka jingthmu ba kongsan jong kane ka jingmareh thong ka long ban pynsngewthuh ia ki jingeh bad ia ka jinglong ryngkat dor ki briew ba don jingduna ha ki dkhot.
U la bynrap ruh ba kane ka Run kan ruh kum shibynta ban ai jingkyrshan ïa ka Mairang Vidyajyoti InclusiveSecondary School, ka Community Based Rehabilitation Programme, Mairang, bad ka Rev. Amirkha School for Disabled, Mawlai.
U la bynrap ba Kino kino kiba kwah ban ïashim bynta ha kane ka jingïamareh ki lah ban pynrung kyrteng ïalade online lyngba ka website kata www.afsdi.org lane lah ruh ban wan pynrung kyrteng offline da kaba leit sha ka Ophis jong ka KJP Synod Sepngi ka ba ha Mission Compound.
Ka AFSDI ka ai ruh katto katne ki jingbthah kiba kongsan na ka bynta baroh ki nongwaniashim bynta ha kane ka jingiamareh thong kalong ba , Ki nongiashim bynta ki hap ban deng ia u Chest number ba la ai da u Nongpyniaid.
Ki nongiashim bynta ki hap ban mareh na baroh ki jaka ba la bthah. Ia ka chest number jong ki nongiashim bynta yn thoh ha baroh ki jaka peit bniah. Ki nongiashim bynta ki bym lah ban iaid lait ia ki jaka talasi kin shah weng noh.
Ki nongiashim bynta ki hap ban wanrah ia ki birth certificate jong ki. Ki briew kiba don jingduna ha ki dkhot met ki hap ban wanrah ia ka kot pynshisha ba ki don jingduna ha ki dkhot met.
Ka AFSDI ka pyntip ruh ba kan don ka khusnam pisa na ka bynta ki nongjop bad ki khusnam Consolations na ka bynta ki top 7 na ka bynta baroh ki kyrdan. Yn ai medal ia baroh kito ki nongiashim bynta kiba la pyndep ia kane ka jingiamamrehthong.
Ki la pyntip ruh ba Ki Nongiashim bynta ki hap ban wan ban shim ia u bib number na ka Ophis jong ka KJP Synod Sepngi kaba don ha Mission Compound ha ka 31 tarik naitung bad ha ka 1 tarik u Nailar 2024 hapdeng ka por 11:00 baje mynstep haduh ka 5:00 baje janmit. Ia ki jingtip ba kham bniah ki paidbah ki lah ban phone ha kine ki number kata 87875-45266, 89747- 61582 bad 94365-57222.
