Shillong, Naitung 26: Ban pynpaw ia ka jingpyrshah halor ka jingshah khot hajir ka Sonia Gandhi ha khmat jong ka Enforcement Directorate halor ka jingai pisa ka party Congress T.90 klur sha ka kot khubor ka National Herald ka party Congress kala pynlong ia ka jingiakhih ha nongbah Shillong.
Hapoh ka jingialam jong u President ka MPCC u bah Vincent H Pala ka party congress ha Meghalaya kala leit ban pynlong ia ka jingiakhih ha khmat ophis ka Enforcement Directorate kaba don ha Langkyrdieng da kaba pyrta pyrshah ia ka party BJP, la kynnoh dei ka BJP kala bthah ia katei ka ophis ban khot hajir ia ka president ka AICC.
Ha ka jingialang ha Congress Bhavan shuwa ban leit sha katei ka ophis jong ka sorkar pdeng kaba don ha kane ka jylla, u president ka MPCC u bah Vincent H Pala la pynshai ba kum ka party ka pyrshah ia kane ka jingleh namar kaei kaba ka party Congress ka bei pisa ia ka kotkhubor jong ka seng Congress ka National Herald la leh katkum ki kyndon ain.
Namar ba katei ka kot khubor jong ka party kala duhnong palat ym shym la lah ban pyniaid ia ka ka Congress party kala airam T.90 klur na ka bynta shiphew snem kata naduh u snem 2002 haduh 2011, kaba dei ban tip ka long ba na ka T.90 klur ka National Herald kala pyndon kam T.67 klur.
Ia katei ka pisa la pyndon kam ban siew ia ka baiwai iing, ki khajna bad ia ki nongtrei kiba la hap ban pynpep noh khlem pat dei por, ka BJP ka shim ba kane ka jingairam ka Congress sha katei ka kot khubor ba dei ka kam sniew.
Mynta ka sngi ka ophis jong ka ED kala khot hajir ha ka sien kaba ar ia ka Sonia Gandhi dei na kane ka daw ba kisa pynlong ia kane ka jingiakhih ha kylleng ka Ri India ban pynpaw ia ka jingpyrshah ba ka BJP ka pyndon kam ia ka ED ban pyndik wat la ka party ka la leh katkum ki ain.
Ha kane ka sngi ki nongkyrshan ka party Congress kila ia poi na kylleng ki bynta jong ka Ri Khasi Jaintia, na Congress Bhavan kila ialeit sha Langkyrding ha khmat ka tei ka ophis kaba don ha Meghalaya ban pyrshah ia ka jingleh ka sorkar BJP.
