Ban pyrshah ia ka CAA pynlong jingialang paidbah ka KSU ha Iew Sohiong

Shillong, Nohprah 22: Ka KSU Sohiong Circle ha katei ka sngi ka la pynlong ia ka jingialang paidbah ha iew Sohiong kum shi bynta ban pyrshah ia ka CAA bad ban dawa ia ka ILP na ka sorkar pdeng.

Ha katei ka sngi la ioh ia ki jingkren na ki nongialam shnong lem bad ki nongialam ka KSU Central Executive Council kiba kynthup ia u samla Sonstar Nongkhlaw, AGS, KSU CEC bad u samla Donald V Thabah, GS, KSU CEC ha ka jingialang ba la pyniaid da u samla Pasbhalang Kharrngi, Advisor, KSU Sohiong Circle.

Ha kane ka jingialang la la pynshai paidbah da ka KSU halor ka jingma kaba ap na ka CAA lyngba ka jingiohlad da kaba suk ki khar bangla Hindu ban rung suk ha jylla Meghalaya lyngba u pud u sam uba jrong 443 km bad lyngba na Assam.

Shuh shuh la pyntip sha ki paidbah ba ki Bangladeshi Hindu ki don haduh 1.40 klur katba ki Khasi pat ki don tang 14 lak ha ki jylla Meghalaya, Assam, Tripura, Mizoram, Manipur bad ha ri Bangladesh.

La pyntip ruh ba lyngba ka Indo Nepal Friendship Treaty 1950 ka jingwan buhai shnong ki briew na Nepal ka jur bha sha jylla Meghalaya kaba la sakhi haduh mynta hapoh sor Shillong bad ki thaiñ khappud wat lada ka Nepal ka jngai da ki hajar km na jylla Meghalaya.

La pynshai paidbah ruh ba ka kynja CAA ka la treikam mynshwa ha u snem 1971 ha kaba ka sorkar India ka la ai jaka shong jaka sah ia ki phetwir na East Pakistan ha ka por jong ka Bangladesh Liberation War.

Kane ka jingai jaka sah ia ki phetwir Bangladeshi la leh da ka sorkar India khlem da ia syllok shwa bad ki nongsynshar shnong bad ki nongialam ka United Khasi Jaintia Hills Autonomous District ha kato ka por.

Ka jingwan kine ki poi wir na Bangladesh ka la ktah jur bha ia ka shongsuk shongsain ka jylla haduh mynta bad bun bha ki jaka ba ki Khasi ki la duh ia ka jinglong trai ha la ka khyndew ka shyiap, ka khaii ka pateng bad ka synshar ka khadar. Khatduh la kyntu ia ki paidbah ka thaiñ Sohiong ban ia snoh kti lang ha ka ban ialeh pyrshah ia ka aiñ CAA bad ban dawa ia ka ILP.

La pynkynmaw ruh ba ka jingdawa ILP ka la sahteng na duh u snem 1987, 2001 bad 2013 bad mynta ka kynti ka la dei ka por ban ioh noh ia kane ka aiñ namar ka seng ka iohi ba haba ym don jingeh ban ai ILP ia ka Manipur balei kan eh ban ai ia ka Meghalaya.

Shuh shuh la bynrap ba lehse imat dei namar ba ki paid Manipur bad Nagaland ki ia khun tyngeh ba ka sorkar India ka pyndem ha ki bad hangta la pynshong nongrim ba ia ki paid Meghalaya kiba ia khih katkum ki riti synshar paidbah ka India ka dei ban sngewthuh lem ha shwa ban jia kano kano kaba sngewsih.

Ia kane ka jingialang la pynkut da kaba thang ia ki tynshop jong u Narendra Modi, Amit Shah bad Agarha Sangma.

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet