Shillong, Naiwieng 17: Ka seng samla pule ka Khasi Student Union bad ka Garo Student Union katkum ka jingpynbeit ka NESO la shai ka sngi kan pynlong ia ka jingshong kyllaiñ mungor kum shi bynta ban pynpaw ia ka jingpyrshah ia ka Citizenship Amendment Bill, 2
016.
Ka jingshong kyllain mungor kan long ha jaka ieng kali ha jan Additional Secretariat lashai ka sngi naduh ka por 12.00 shiteng sngi haduh 4.00 baje nohphai sngi. Hapdeng kane ka NESO, KSU bad GSU kin phah ruh ia ka dorkhas sha u myntri rangbah duh ka Ri u Narendra Damordas Modi bad u myntri ba dei peit ia ki kam pohïing u Amit Anilchandra Singh lyngba u lat ka jylla u Tathagata Roy.
Kiwei ki seng ki ban wan ia shim bynta ki long kum ka kum ka Federation of Khasi Jaintia bad Garo People, Hynniewtrep National Youth Front, Ri Bhoi Youth Federation, Arunachal Students’ Union Shillong, Shillong Socio Cultural Assamese Students’ Association, Mizo Students’ Union, Naga Students’ Union, Twipra Students’ Federation, Shillong Karbi Students’ Association, All Bodo Students’ Union bad kiwei kiwei.
Kane ka jingshong kyllaiñ mungor kan long ha baroh ki nongbah ka thain shatei lam mihngi jong ka Ri India, da ki seng samla pule katkum ki jylla ka jong ki hapoh ka lama jong ka NESO.
