Ban pyrshah ia ka Citizenship (Amendment) Bill, 2016 ka AJYWO kan thoh sha ka MHA  

Jowai, Nohprah, 02: Ka All Jaintia Youth Welfare Organisation Central Body, kawei na ki sengbhalang jong ki samla na Ri Jaintia, ha ryngkhat bad ki samla pule, ka NESO, ka ieng pyrshah pyrshah jur ia ka Citizenship Amendment Bill 2016  jong ka Sorkar India kaba kwah ban kdup nong India ia ki kynhun jaidbynriew na ka kynhun niam Hindus, Sikhs, Buddhists, Jains, Parsis and Christians kiba na Afghanistan, Bangladesh and Pakistan ban long kum ki nong India.

“Ka AJYWO, ka ieng pyrshah jur ia ka Citizenship Amendment Bill 2016   jong ka sorkar India, ha ka nongrim ba lada ka sorkar India kan ioh pynlong aiñ ia katei ka bill, kan buh ia ka jaidbynriew rit paid jong ngi ha ka jylla Meghalaya bad ka thaiñ Shatei lam-mihngi ka India ha ka jingma kaba khraw  na ka lah ban duh jaid noh shisyndon da jingshah tyllep  ha ki jaidbynriew heh paid jong ka Ri India” ong u Bah M H Dkhar President, ka AJYWO Central Body.

“Kum ki trai ri trai muluk rit paid jong ka thainñ Shatei lam-mihngi jong ka Ri India, ngim lah ban len ba ka jaitbynriew trai ri trai muluk rit paid ba pher ba pher jong ngi ka don ha ka jingma kaba khraw  mynta na ka jinglah ban shah tyllep ha ki jaidbynriew heh paid. Ka nuksa ba shai kdar ha ka jingiadei bad kane ka jingma ka long na ka jylla Tripura ha kaba ka jaidbynriew trai ri trai muluk hangtei ka lah kylla rit paid ha la ka jong ka jylla (ri)”.

“Ki lah don lypa shibun ki jaka ha  ka thaiñ Shatei lam-mihngi jong ka Ri India, kynthup ia ka jylla Meghalaya bad ka Ri Jiañtia jong ngi, ha kaba ki kynhun jaidbynriew heh paid na kiwei pat ki jylla jong ka Ri India ki la la ia boi lypa bad kane ka la buh lupa ia ka thaiñ jong ngi, ia ka jylla Meghalaya bad Ri Jaintia jong ngi ha ka jingma kaba khraw”.

“Kumno ka sorkar India, tang ia la ki jong ki khun ki kti kam lah ban pyndap pynbiang ia ki jigndonkam jong ki ha baroh ki liang, ka khmied bad kner pynban ki khmat bad kti sha kiwei pat ki jaidbynriew jong kiwei pat ki ri jong ka pyrthei”.

“Lada ka sorkar India, kan ioh ban pass ia  kane ka bill, ngi kum ki trai ri trai muluk ri paid jong ka thaiñ Shatei-lammihngi, ngin sa don ha ka jingma kaba khraw, kumta, kum ki nongshongshnong jong ka thaiñ Shatei lam-ngi, ngi dei ban ieng tylli kawei ban pyrshah jur ia kane ka Bill jong ka sorkar India”

“Ka Ri India ka la don lypa jin haduh 1.3 Billon ngut tam ki nongshongshnong jong ka. Tang ia kine ruh kam lah ban pyndap pynbiang, mynta ka khmiet pynban ki khmat bad kner ki kti sha kiwei pat ki nongshnong jong kiwei pat ki ri. Don aiu sha lyndet jong kane, ngim sngewthuh shuh”.

Ki jaibynriew trai ri trai muluk jong ka thaiñ shatei lam-mihngi ka India ki la don lypa ha ka jingma. Ngim ithuh ithaw shuh kiei kine ba ia boi ha ka thaiñ, ym tip shuh la u dei u nong Bangladesh, ne nong Pakistan, ne nong Afghanistan. Ka kamram jong ka Sorkar ka dei ban ban khynra ia ki mynder ri kiba lah ban don ha ka thiañ Shatei lam-ngi bad pynher krat ia ki na ka thaiñ bad ka Ri India hynrei ym ban khroh pynban bad pynlong nong India ia ki nongwei hangne.

Ka AJYWO ka pyrshah jur ia ka Citizenship Amendment Bill-2016 jong ka sorkar India  bad ruh ka dawa na ka India ban pyndam noh mardor ia kane ka Bill”.  Ka AJYWO kan sa pynher da ka jingthoh sha u Prime Minister bad u Minister jong ka MHA jong ka Sorkar India ban pynpaw ia ka jingpyrshah jur jong ka ia kane ka Citizenship Ammendment Bill jong ka India bad ruh ban dawa pyndam noh ia ka shisyndon.

 

 

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet