Shillong, Iaiong 10: U Myntri ba peit ia ka tnad Social Welfare u Bah Paul Lyngdoh hynne ka sngi ka 10 tarik ïaiong ka la don ka jingialang bad ka kynhun jong ka DGP, SP ANTF, bad u Mission Director Dreams ban iamir jingmut halor ka jingkynrei u Droks ha ka Jylla bad na ka liang ka sorkar ka la shim katto katne ki rai .
Haba kren bad ki lad pathai khubor na ka liang u Myntri u la ong kawei na ki jingeh kaba mih ha kane ka jingiakhun ia u Droks ka dei ha ka por ba kem ia kine kiba dih droks hap ban pynkhuid ia ki na ka jingdih ia u Droks , kaba ar ka Counselling na ka bynta ka jingpyni lynti ia ki ban wanphai biang sha ka imlang Sahlang.
u la pynpaw ba ki jaka sumar kum ka Civil hospital ka duna palat , kumta na ka liang ka Sorkar ka la rai ban buh da ka Addiction Treatment Facility (ATF) ka jaka sumar na ka bynta kito kiba kyrni ha ka jingdih droks ha Umsawli ka ban lut sha ka 50 lakh .
U la ong ruh ha kane ka jaka kin don ruh ki psychiatrist ki ban ai jingsumar ia kine ki nongdih droks bad ka sorkar kan thung kumba 5 ngut ki Psychiatrist ha kane ka jaka sumar ha Umsawli bad ha kine ki sngi kin sa leit ban jurip ia kane ka jaka na ka bynta ka jingdonkam baroh.
