New Delhi, Lber 22: Mynta ka sngi la pynlong ka jingialang mynta ka sngi bad ki Chief Secretary jong baroh ki jylla da u Cabinet Secretary bad u Principal Secretary jong u Myntri Rangbah duh jong ka Ri. Baroh ki Chief Secretary ki la pyntip ba ka don ka jingkyrshan kaba pura ia ka jing kyntu jong u Myntri Rangbah duh jong ka Ri ban bud ia ka Janta Curfew.
Ha ka jingpyrshang ban teh lakam ia ka jingpur jong kane ka jingpang, la rai ba ka long kaba donkam ban bteng ia ka jing sangeh shipor ia ka jingleit jingwan ki briew na kawei ka jaka sha kawei pat kaba kynthup ia ki bus na kawei ka jylla sha kawei pat haduh ka 31 tarik u Lber 2020.
Hadien kane ka jingiakren, la bthah ia ki Sorkar Jylla ban hokum ba yn shah tang ia ki kam bym lah lait ba kin dang iaid ha ki 75 tylli ki Distrik ba la pynshisa ba la pynthikna ka jingdon ki nongpang COVID-19 lane ba la don kito kiba la iap na kaneka jingpang.
Ki Sorkar Jylla ki lah ruh ban kyntiew ia kane ka list katkum ka jingsngewthuh jong ki halor ka jinglong jingman. La iohi ruh ba don kato katne ki Sorkar Jylla kiba la leh lupa ia kane ka kam.
Ha kane ka jingialang la shim ia ki rai ba la pyn sangeh ia ki rel haduh ka 31 tarik u Lber 2020 ba kynthup ruh ia ki rel ha ki shnongbah. Hynrei la pyllait ia ki rel kit tiar na kane ka jingrai.
La pyn sangeh ia ki rel metro haduh ka 31 tarik u Lber 2020. Ki Sorkar Jylla ki dei ban ai hokum ban shah tang ia ki kam bym lah lait ba kin dang iaid beit ha kumba 71 tylli ki distrik ba la pynshisha ba la lap ia kiba pang COVID 19.
La pyn sangeh ia ki bus kiba iaid na kawei ka jylla sha kawei pat haduh ka 31 tarik u Lber 2020.
