Ban wan rah ia ka jingthung kam kaba khuid kynduh ka HYC ia ka DC jong ka SWKH District

Shillong, Naitung 20: Ka HYC South West Khasi Hills ka la leit ban iakynduh ia ka  Deputy Commissioner mynta ka sngi halor ban pynthikna ba kano kano ka jingthungkam kan long kaba khuid kaba suba la ai jingmut ia ka  Deputy Commissioner jong ka South West Khasi Hills District.

Ha kane ka jingiakynduh ka HYC kala ong ban pynthikna ba kan nym don kano kano ka jingai lypa ia ki jingkylli, halor kane kila ai jingmut ba kano kano ka tnad ba pyniaid ia ki jingthungkam (DSC lane ki eksam pynkiew kyrdan ha ki tnad ka sorkar ka dei ban phah pynkhreh ym duna 20 set ki jingkylli.

Ynda ki nongwadkam kam ki la rung ha ka jaka thoh eksam  sa jied ia ka jingkylli ban sam da kaba shu khalai nusib bad ia kata dei ban da ring video . Ia kiwei pat ki jingkylli bym shym la sam hadien ba kut ka jingthoh eksam dei ban thep ha ki Website bad dei ruh ban tah ha ki Public Notice Board khnang ba baroh kin tip ba ka don ka jingiapher kawei ka Question Paper na kawei pat.

Ka seng kala ong ba ka thup jingkylli ban ai ia ka mark kam dei ban tam ia ka 12% kumba la kdew da ka Supreme Court ka Ri India ha bun tylli ki rai jong ka. Dei ban buh CCTV bad dei ban ring video ia baroh ki Examination Centre, ia ki interview bad kumjuh ruh ha ka por ba niew ia ki mark .

Ka HYC kala ai jingmut ba dei ban pynbna ia ki result hapoh ka 24 kynta mar ia dep ka interview. Ki briew ba pyniaid ia ka interview ym dei ban shah ba kin phone briew ne rah mobile phone ha ka por ba shim interview haduh ban da pynbna ia ka result .

Ka jingthung ia ki nongshim interview, ki nongset jingkylli bad ki nong bishar ia ki jubab kim dei ban dei ki briew kiba ia don bynta ha ka politic ne ki dkhot jong kano kano ka Political Party ne kiba ha ing jong ki MLA, MP ne MDC. Ka HYC ka  ai jingmut ba ki nongshim interview kin dei ki briew kiba la pass ia ka Master Degree bad kiba don ka nam babha ha ka imlang sahlang .

Lada jia ba ki nongshim interview ki don ka jingiadei ba ha ing , ia dei kur , ia dei para shnong ne kivia jan bha ka long ing long sem bad ki nongthepkam ym dei ban shah ia ki ba kin shim ia kata ka interview bad kabha ban don kham bun ki nongshim interview.

Baroh ki briew kiba ia don bynta ha ka jingpyniaid ia ka jingthung kam naduh ki nongset jingkylli, ki nongbishar ia ki jingkylli bad ki nongshim interview ki dei ban wan pyntip bad iathuh ia ka jingdon jingem jong ki bad kiba ha ing jong ki ha shwa ba kin shim ia ka kam bad hadien kata kumba 5 snem kynthih hadien ba la dep ia ka jingthungkam. Dei ban buh ia kine ki jingpyntip ha ki jingpyntip paidbah.

Ha ki jubab jong ki jingthoh ia ka eksamin ym dei ban shah ba kin thoh ia ka kyrteng jong ki nongthep kam, tang ka number dei ban thoh. Haba bishar  ia ki jubab dei ban da tap noh lypa ia ki number jong ki candidate bad dei ban don ka CCTV lane video recording ha ka por ba bishar ia ki jubab. Ka HYC ka  dawa ruh ba ka bha ban don kumba lai kynhun ne lai sien bishar ia ki Answer Script khamtam eh ia ki jingkylli ba jrong.

Ia ki jingkylli barit la dei ban shu pyndonkam da kito ki jingkylli ba haba bishar ia ki dei ban shu scan da ki computer. Ka seng kala ong ba ym dei ban pan ia ka syrnot jingtbit  haba thungkam namar bun ki samla pule hadien bun bun snem ba ki la pass ia ki jingpule kim iohkam iohjam te kin ioh Experience Certificate naei.

Ia kino kino ki briew kiba pynkhein ia ki kyndon ba la buh bad ia kito ki samla wadkam kiba leit pan jingiarap na ki politician ne ki nongshim interview ne ki nongpyniaid ia ka jingthepkam dei ban pynngat kyndon aiñ kum ki kyndon jong ka Prevention of Curruption Act bad dei ruh ban buh dak sniew  syndon ia ki haba ki thep ia kino kino ki iam sorkar ha ka Ri India hi baroh kawei.

Ia ki politician ne ki ophisar sorkar ne kino kino ki briew kiba wan mushlia ia ka jingthungkam dei ban pynngat kyndon ia ki ruh . Ia ki briew ba ia don bynta ban pyniaid ia ka recruitment lada lap ba ki pynkhein ia ki kyndon dei ban weng noh na kata ka kam ba ki bat, ia ki ophisar dei ban wengkam syndon ia ki bad kumjuh ruh dei ban pyngat kyndon ia ki.

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet