Shillong, Nailar 05: U Bah Pyniaid Sing Syiem, MDC ka Sohryngkham uba dei ruh u Chairman ka Khasi Hills Autonomous District Council (KHADC), u la ïakren bad u Myntri Khynnah ba dei peit ia ka tnad ïada Ri, Ajay Bhatt ban weng ia ka khyrdop ka 58 GTC kaba la wanrah jingeh ia ki nongshong shnong ka shnong Mawshbuit.
Ha ka jingiakynduh bad u Bhatt ha Delhi ha ka step 05 tarik u Nailar, 2021, u Bah Pyniaid u la ong, “Ka don ka surok PWD kaba pyniasoh sha ka shnong Mawshbuit kaba hap iaid lyngba ka Campus jong ka 58 GTC”.
U la ong ba ia ka surok la pyndonkam da ki nongshong shnong khlem jingwit ha ki snem 1983-1984. “Hadien kitei ki snem ki bor shipai ki la thaw ia ka khyrdop kaba la tip kum ka Dronacharya khlem ïoh jingbit na ki bor ka PWD”, u la ong.
“Kham hadien ka la don ka jingpyndik ia ki nongshong shnong da kaba talasi ia ki kumjuh ia ki kali kiba iaid ba ïeng lyngba ka khyrdop”, u la ong. “Kane ka la pynbitar ia ki paidbah na ka jingleh donbor ki shipai ka 58 GTC”, u la bynrap.
Da kaba iathuh ba u la ioh pdiang ia ki jingujor na kiba bun halor ka jingshah pyndik, u la ong, “Ki shipai ki pyndonkam da ki ktien kiba khor wat hapdeng ka jingdon lang ki kynthei khynnah”.
U la iathuh, “Ngi la pynlong ka jingiajurip bad ki bor Sorkar bad ki nongialam na ka 58 GTC hynrei kam shym la poi sha ka jingthmu ban weng ia ki jingeh”.
“Nga kyntu ia phi ban tuklar lem halor kane ka jingeh kaba la pyndik palat. Ngan kyrshan ruh lada ka donkam ban weng ia kane ka khyrdop lane wat lada thaw ia ka kynroh ha baroh arliang kane ka surok kumba leh ha ka 101 Area bad Air Force khnang ba ki paidbah kin suk ha ka leit ka wan khlem jingshah pyndik”, u la ong.
