Shillong, Naitung 20: Tang hadien katto katne kynta ka jingbthah na ka liang ka CEC lyngba u President Rangbah ka Seng ia ki shnat treikam ka Seng ha kylleng ka Bri U Hynniewtrep ban pyrman ia ka rung ka mih ki briew napoh ka Ri Bangladesh.
Ia kine ki dkhot ka HYC kila ioh bat ha ka meit 19/7/2024, ki dkhot ka HYC Ribhoi District ha ka por kumba 7 baje janmiet ki lah ioh ban bat haduh 57ngut ki briew Kiba dei ki Bangladeshi kiba lahwan lyngba ka West Bengal sha kane ka Jylla jong ngi.
Hadien ba lap ia kitei ki briew na Lad Umroi kiba lah wan da ka Bus ba don ia u Registration No. WB 87 0642, ki dkhot ka Seng ki lah kylli pyrthuh ia ki kot ki sla bad ka leit ka wan ka jong ki.
Ha kaba sdang kine ki briew ki pyni ia ki Passport bad ki Visa ki jong ki bad ong ruh ba ki thmu ban leit sha Silchar, Assam bad don ruh kiba ong ba ki thmu ban wan sha Shillong bad leit shangkai sha Sohra.
Hynrei haba kylli pat ia ka jaka ba ki thmu ban shong ban sah miet kine ki briew kim shym lah ai ka jubab kaba shai. Hadien ka jing bymshai ka jubab na kine ki briew.
Ki dkhot ka Seng ki la aiti noh ia kitei ki briew sha ki pulit jong ka Umiam Police Station khnang ba kin ioh ban tohkit bad ba kin leh katkum ka aiñ . Ki dkhot ka Seng ki lah pyntip ia kane sha ki Nongialam ka CEC kiba lah pyntip pat ia kane ka kam sha ki bor ba halor.
Hadien katto katne kynta bad hadien ba lah peit ia ki kot ki sla, ki Pulit ki lah pyllait noh ia kitei ki briew baroh bad pyntip ruh sha ka Seng ba kine ki briew kin leit Sha Silchar, Assam.
Ki dkhot ka Seng ki lah ap bad buddien ia kitei ki briew hynrei lah lap ba ka kali ba kit ia ki kam shym lah iaid sha Bypass ban leit Sha Silchar lyngba ka Mawryngkneng-Jowai ter ter hynrei ka lah noh pynban sha ka lynti ban leit phai sha Guwahati. Kumta, ki Dkhot ki lah pynlong ka jingap miet namar kane ka jingleh jong ki ka lah pynsuba jur ia ka jingthmu jong kine ki briew.
Ha ka step jong ka 20 tarik, lah pyntip da ki Paidbah ba kine ki briew ki lah wanphai biang sha Lad Umroi bad nangne ki lah kiew pat ha ki kali sumo jong ki Trai Jylla bad ki lah leit Sha thain Sohra.
Ka Seng ka lah pynlong ia ka jingwad jingtip wut wut bad ioh ruh ia ki Number kali jong ki Sumo kiba lah kit ia ki sha Sohra bad pynlong ka jingpeit pyrman ia ka iaid ka ieng jong kine ki brew.
Na ka liang ki Nongialam ka CEC ki lah pyntip ruh sha ki bor pulit ka Distrik bad Sohra Sub-Division Ban buddien ia kine ki briew khnang ban pyntikna ba ym dei uwei ruh na kine ki 57 ngut ban iohlad ban shong ban sah beain ha kane ka Ri Baieid eh ka jong ngi.
Ka HYC ka kyntu ruh ia ka Sorkar ba kan bthah ia ki Infiltration Gate ha kylleng ka Jylla bad ia ki bor pulit ba kin phikir bha ia ka jingrung jingmih jong ki briew khamtam eh na Bangladesh ha kum kane ka por bad na ka liang ka Seng ruh kan peit pyrman bha ban nym ailad ba kine ki Bangladeshi kin iohrung bad shong shnong hangne ha Ri Lum Khasi- Jaintia.
Ka HYC ka khot bad wer ruh ia ki bor shnong, ki bor Hima ba kin ia long Kiba phikir bad teh Lakam ia ka jingrung jingmih ki briew ba nabar ha kum kane ka por. Kane ka long katkum ka kyrwoh kaba la phah da u bah Hercules Suting President ka Ri Bhoi District.
