Shillong, Nohprah 21: ka ophis jong u US Consulate Kolkatta kala shim 50 ngut ki samla pule na Guwahati bad 25 ngut na ka nongbah Shillong ban hikai ia ki ban pyntbit kyrpang ha ka ktien phareng. Ia ka jinglut jingsep baroh na ka bynta kine ki samla pule kan bei ka Ri America.
U James A Dragon u ba dei peit ha ka jingiadei bad ki paidbah na ka ophis jong ka US Consulate kaba don ha Kolkatta u la wan sha Shillong ha ka sngi palei ban plie ha ka jaka ai jinghikai hapoh Hills Crest Higher Secondary School ha Rynjah ha kaba la jied 25 ngut ki samla pule na kane ka jylla.
Haba kren ha u SP News Agency ha katei ka jaka, u James A Dragon u la iathuh ba ka “English Access Micro-scholarship Program” ka long ban hikai ia ki samla pule ban nang bha ia ka ktien phareng, namar kiba nang ia ka ktien phareng ki kham suk ha ka ioh kam ioh jam.
La iathuh ba ia kane ka rukom shim ia ki samla pule ban hikai kyrpang ia ka ktien phareng la leh ha ki 85 tylli ki ri jong ka pyrthei bad ia kane ka kam la sdang ha u snem 2000 bad ha ka pyrthei baroh kawei kiba la ioh jinghikai ki long shilak ngut.
Haba phai sha kane ka dong shatei lam mih ngi jong ka Ri India, u Dragon u la iathuh ba kane ka dei ka sien kaba nyngkong ba kila wan sha kane ka thain. U la iathuh ba ia mynta la shim 85 ngut ki samla pule na Assam bad Meghalaya, ha Guwahati 50 ngut bad ha Shillong 25 ngut. La ong ba kin dang pnyiar shuh shuh ia kane ka North East.
Kane ka jinghikai nalor ka ktien phareng, kin hikai ruh ia ki kor komputer,kin hikai ruh ban tip ia ki riti dustur jong kiwei ki jaidbynreiw ha kane ka pyrthei. Na ka liang jong ka ophis ka sngew ba kane kan iarap ia ki samla ban ioh kam ioh jam ha kane ka spah snem kaba 21 mynta. Ki samla pule kaba kila shim ka long ha pdeng ka rta 12 haduh 20 snem.
