Shillong, Nailur 12: U bah Teinwell Dkhar Chief Executive Member (CEM) jong ka KHADC u la iathuh ba ka ophis mynta ka sngi kala phah ia ki jingpyntip sha baroh ki Hima, ki Sirdar, ki shnong ba lada ki don kino kino ki briew kiba phylla kiba wan ha shnong ha thaw ki dei ban pyntip sha ki rangbah shnong, ki syiem sordar kum juh sha ki pulit.
Ka jingpynmih jong ka KHADC ia kane ka hukum mynta ka sngi ka long ha dien ka jylla Assam kala pynmih ia ki kyrteng hapoh jong ka NRC, kane ka long ban khanglad ia ka jingwan rungtuh jong ki briew kiba na sha bar jong ka jylla, la ong u CEM jong ka KHADC u Bah Teinwell Dkhar.
Haba ia dei bad ka jingkwah ban pynkylla ia ka Sixth Schedule, na ka liang jong u CEM u la ong ba ka sorkar kala dep ban thaw ka Committee ha kaba la khlieh da u Myntri ba dei peit ia ka District Council u James K Sangma ha kaba ki District Council ki don lang ha kane ka committee bad kiwei kiwei ki dkhot kyntup ia u Advocate general jong ka sorkar jylla.
Na ka liang jong u CEM jong ka KHADC u la iathuh ruh ba na ka liang jong ka KHADC kala pynmih ia ka hukum ban khang ia ka jingpyndon kam ia ka pla plastic ha baroh kiwei jong ka District Council, kum ka Iew Byrnihat, Laitlyngkot bad kane kan long ruh ha kiwei kiwei ki iew kiba hap hapoh jong ka KHADC.
Na ka liang jong u bah Pyniaidsing Syiem Deputy CEM jong ka KHADC, u la ong ba kane ka EC hapoh ka jingialam jong u bah Teinwell Dkhar kam shym la shongkli kti halor ki mat kiba ktah ia ka jaidbynriew.
La iathuh ba na ka liang jong ki District Council, ka KHADC, JHADC bad GHADC kila ia kynduh la ai sien ia ka sorkar jylla ban ia kren halor ka jingkwah jong ka sorkar pdeng ban pynkylla ia ka Sixth Schedule bad na ka liang jing u myntri rangbah ka jylla u la shim khia ia kane.
